ახალი სტარტაპი სმარტფონების ჰაკინგისთვის 20 მილიონ დოლარს სთავაზობს

არაბთა გაერთიანებულ საემიროებში დაფუძნებული ახალი კომპანია Advanced Security Solutions მზადაა, 20 მილიონ დოლარამდე გადაიხადოს ისეთი პროგრამული ხარვეზებისთვის, რომლებიც ნებისმიერი სმარტფონის გატეხვის საშუალებას იძლევა.

კომპანია განსაკუთრებულ ყურადღებას ე.წ. „ზერო-დეი" ხარვეზებზე ამახვილებს - ესაა პროგრამული უზუსტობები, რომლებიც თავად პროგრამის შემქმნელებისთვისაც უცნობია. გარდა 20-მილიონიანი ჯილდოსი, კომპანია სხვა სისტემების ხარვეზებისთვისაც იხდის: Android და iPhone მოწყობილობებისთვის - 15 მილიონს, Windows-ისთვის - 10 მილიონს, Chrome-ისთვის - 5 მილიონს, Safari და Microsoft Edge ბრაუზერებისთვის კი - 1 მილიონ დოლარს.

კომპანიის ვებგვერდზე აღნიშნულია, რომ ისინი თანამშრომლობენ 25-ზე მეტ სამთავრობო და სადაზვერვო სააგენტოსთან მსოფლიოს მასშტაბით. მათი განცხადებით, ორგანიზაცია დაკომპლექტებულია პროფესიონალებით, რომლებსაც 20 წელზე მეტი გამოცდილება აქვთ ელიტურ სადაზვერვო დანაყოფებში.

უსაფრთხოების ექსპერტების შეფასებით, კომპანიის მიერ შეთავაზებული ფასები ბაზრის რეალობას ასახავს. ერთ-ერთი მკვლევარის თქმით, 20 მილიონი დოლარი შესაძლოა დაბალ ფასადაც კი ჩაითვალოს, თუმცა იგი აფრთხილებს პოტენციურ გამყიდველებს, არ ითანამშრომლონ კომპანიასთან, რომლის მფლობელებიც უცნობია.

ბოლო ათწლეულში „ზერო-დეი" ხარვეზების ბაზარი მნიშვნელოვნად გაიზარდა. 2015 წელს Zerodium-ი iPhone-ის გატეხვის ინსტრუმენტებისთვის 1 მილიონ დოლარს სთავაზობდა, Crowdfense-მა 2018 წელს ეს თანხა 3 მილიონამდე გაზარდა, ხოლო გასულ წელს უკვე 7 მილიონ დოლარამდე აიწია.

Advanced Security Solutions ასევე სთავაზობს 2 მილიონ დოლარს Telegram-ის, Signal-ისა და WhatsApp-ის ხარვეზებისთვის. რუსული კომპანია Operation Zero კი, რომელიც მხოლოდ რუსეთის მთავრობასთან თანამშრომლობს, მსგავსი ექსპლოიტებისთვის 20 მილიონ დოლარამდე იხდის.