Alphabet ხელოვნური ინტელექტის ინფრასტრუქტურისთვის 80 მილიარდი დოლარის მოზიდვას გეგმავს

Google-ის მშობელმა კომპანიამ, Alphabet-მა, ორშაბათს განაცხადა, რომ 80 მილიარდი დოლარის მოზიდვას აპირებს. ეს თანხა ხელოვნური ინტელექტის (AI) მასშტაბური ინფრასტრუქტურის მშენებლობას მოხმარდება, რომელიც კომპანიას წინასწარ აქვს დაგეგმილი.Alphabet აღნიშნულ თანხას საკუთარი აქციების გაყიდვით მიიღებს. კომპანიის განცხადებით, ფინანსები გამოყენებული იქნება „ზოგადი კორპორაციული მიზნებისთვის, მათ შორის კაპიტალური ხარჯებისთვის, რათა მოხდეს ხელოვნური ინტელექტის ინფრასტრუქტურისა და გლობალური გამოთვლითი სიმძლავრეების (global compute) მასშტაბირება“.გეგმის ერთ-ერთი მნიშვნელოვანი ნაწილი 10 მილიარდი დოლარის ღირებულების აქციების მიყიდვას გულისხმობს Berkshire Hathaway-სთვის — გლობალური ჰოლდინგური კომპანიისთვის, რომელსაც წარსულში უორენ ბაფეტი ხელმძღვანელობდა.კომპანიის განმარტებით, ბაზარზე ფიქსირდება ხელოვნური ინტელექტის გადაწყვეტილებებსა და სერვისებზე მოთხოვნის მკვეთრი ზრდა როგორც საწარმოების, ისე მომხმარებლების მხრიდან. მოთხოვნის ეს დონე ამჟამად აჭარბებს კომპანიის არსებულ მიწოდების შესაძლებლობებს. „ინვესტიციების მასშტაბირებით, კომპანია მიზნად ისახავს ფუნდამენტური ინფრასტრუქტურის გაფართოებას, რათა ხელი შეუწყოს სამომავლო ზრდის მნიშვნელოვან შესაძლებლობებს“, — ნათქვამია Alphabet-ის განცხადებაში.კომპანიამ ასევე დაამატა, რომ აქციების გაყიდვის გეგმა წარმოადგენს გზას „ინვესტიციების დაბალანსებული დაფინანსებისთვის, ისე, რომ შენარჩუნდეს ჯანსაღი ბალანსი“. სხვა ტექნოლოგიური გიგანტების მსგავსად, Google-მა წელს გამოთვლითი სიმძლავრეების გაზრდის მიზნით მასშტაბური ინვესტიციების შესახებ გამოაცხადა. ეს რესურსები ხელოვნური ინტელექტის ახალი სერვისების მხარდასაჭერად იქნება გამოყენებული.გასულ თვეში გამართულ Google I/O კონფერენციაზე, აღმასრულებელმა დირექტორმა სუნდარ პიჩაიმ აღნიშნა, რომ წლის ბოლომდე კომპანია კაპიტალურ ხარჯებზე (capex) 180-დან 190 მილიარდ დოლარამდე დახარჯვას გეგმავს. მოსალოდნელია, რომ Google და სხვა წამყვანი ტექნოლოგიური კომპანიები წელს ხელოვნური ინტელექტის კაპიტალურ ხარჯებში ჯამში 700 მილიარდ დოლარამდე დააბანდებენ.