Apple-ის Mac-ების გაყიდვები AI-ზე გაზრდილი მოთხოვნის ფონზე მოლოდინს აჭარბებს

Apple-ის ბოლო კვარტალურ ანგარიშში მთავარი ყურადღება iPhone-ის გაყიდვებმა და სერვისებიდან მიღებულმა შემოსავლებმა მიიპყრო, თუმცა Mac-ის კომპიუტერებმა, ხელოვნურ ინტელექტთან დაკავშირებული სამუშაოების ზრდის ფონზე, მოლოდინს საგრძნობლად გადააჭარბა. უოლ-სტრიტის ინვესტორები ვარაუდობდნენ, რომ Mac-ის შემოსავალი 8 მილიარდი დოლარის ფარგლებში იქნებოდა, თუმცა კომპანიამ 28 მარტს დასრულებულ მეორე კვარტალში 8,4 მილიარდი დოლარის მაჩვენებელი დააფიქსირა.

ეს მაჩვენებელი მნიშვნელოვანი წარმატებაა ტექნოლოგიური გიგანტის ბიზნესის ამ სეგმენტისთვის. ანგარიშის გამოქვეყნებამდე ინვესტორები ფიქრობდნენ, რომ Mac-ის გაყიდვები წინა წელთან შედარებით თითქმის უცვლელი დარჩებოდა, თუმცა რეალურად წლიური ზრდა 6%-ს გაუტოლდა. კომპანიის მთლიანმა შემოსავალმა კი 111,2 მილიარდი დოლარი შეადგინა, რაც გასული წლის ანალოგიურ პერიოდთან შედარებით 17%-იანი მატებაა.

MacBook Neo და ბაზრის რეაქცია

Apple-მა Mac-ის გაყიდვების ზრდა ნაწილობრივ ბოლო პერიოდში გამოშვებულ პროდუქტებს, მათ შორის MacBook Neo-ს წარმატებულ გაშვებას დაუკავშირა. მიუხედავად იმისა, რომ ეს ფერადი კომპიუტერები გაყიდვაში მხოლოდ მარტის ბოლო კვირებში გამოჩნდა (წინასწარი შეკვეთები 4 მარტს დაიწყო), მათზე მოთხოვნა ძალიან მაღალი აღმოჩნდა. რეალურად, ერთეულების უმეტესობა მარტის შუა ან ბოლო რიცხვებში გაიგზავნა, ხოლო გარკვეული მოდელების ამოწურვის გამო, მოთხოვნის ნაწილმა აპრილის თვეში გადაინაცვლა.

Apple-ის აღმასრულებელმა დირექტორმა, ტიმ კუკმა, ანალიტიკოსებთან საუბრისას აღნიშნა, რომ Neo-ზე მოთხოვნამ ყოველგვარ მოლოდინს გადააჭარბა. მან ასევე ხაზი გაუსვა, რომ ამ კვარტალში Mac-ის ახალი მომხმარებლების რეკორდული მაჩვენებელი დაფიქსირდა, რაც ნაწილობრივ სწორედ Neo-ს დამსახურებაა.

AI როგორც ზრდის მთავარი მამოძრავებელი ძალა

კუკის განმარტებით, გაყიდვების ზრდაში გადამწყვეტი როლი ითამაშა პლატფორმის გამოყენებამ ლოკალური ხელოვნური ინტელექტის მოდელების გასაშვებად, როგორიცაა OpenClaw. ამ ფაქტმა კომპანია გარკვეულწილად გააკვირვა კიდეც, რადგან ბოლო კვირების განმავლობაში Mac mini და Mac Studio მოწყობილობების მარაგი სრულად ამოიწურა.

„ორივე მათგანი საუკეთესო პლატფორმაა AI და აგენტური ხელსაწყოებისთვის (agentic tools). მომხმარებლებმა ეს იმაზე სწრაფად გააცნობიერეს, ვიდრე ჩვენ ვპროგნოზირებდით, რის გამოც მოთხოვნა იმაზე მაღალი აღმოჩნდა, ვიდრე ველოდით“, — განაცხადა კუკმა Mac-ის გაყიდვების კომენტირებისას.

აღსანიშნავია, რომ Mac mini ჩინეთში ყველაზე გაყიდვადი დესკტოპ კომპიუტერი გახდა — ბაზარზე, სადაც ბოლო დროს OpenClaw-ის მიმართ განსაკუთრებული ინტერესი შეინიშნება. მიუხედავად ამისა, კვარტალურ ჭრილში Mac-ის შემოსავალი სტაბილური დარჩა, რაც იმაზე მიუთითებს, რომ ახალი მოთხოვნა ჯერ კიდევ მასშტაბირების პროცესშია.

მიწოდების დეფიციტი და კორპორატიული სექტორი

ტიმ კუკის თქმით, Apple-ს შესაძლოა რამდენიმე თვე დასჭირდეს მიწოდებასა და მოთხოვნას შორის ბალანსის მისაღწევად Mac mini-სა და Studio-ს მოდელებზე. მისი განმარტებით, ეს შეფერხება გამოწვეულია არა რაიმე პრობლემით, არამედ იმით, რომ კომპანიამ სათანადოდ ვერ შეაფასა მოსალოდნელი მოთხოვნა.

ზრდაში მნიშვნელოვანი როლი ითამაშა კორპორატიულმა სექტორმაც. Apple-მა მაგალითად მოიყვანა რამდენიმე მსხვილი კომპანია, მათ შორის Perplexity, რომლებმაც Mac აირჩიეს საწარმოო დონის AI ასისტენტების შესაქმნელად. გარდა ამისა, კომპანია აწყდება მიწოდების შეფერხებას MacBook Neo-ს შემთხვევაშიც. საინტერესოა, რომ საგანმანათლებლო სფეროშიც შეინიშნება ცვლილებები — მაგალითად, კანზას-სიტის საჯარო სკოლებმა Chromebook-ების ნაცვლად არჩევანი სწორედ Neo-ს მოდელებზე შეაჩერეს.