AWS-ის დიდი ფსონი ხელოვნურ ინტელექტზე: მზად არიან თუ არა კლიენტები?

Amazon Web Services-ის (AWS) ყოველწლიური ტექნოლოგიური კონფერენცია re:Invent ნათლად აჩვენებს, რომ ღრუბლოვანი ინფრასტრუქტურის გიგანტი მთელ თავის რესურსს ხელოვნური ინტელექტის მიმართულებით დებს. კომპანიამ ათობით სიახლე წარადგინა, დაწყებული ახალი AI აგენტებითა და განახლებული დიდი ენობრივი მოდელებით, დამთავრებული მათი შექმნის შესაძლებლობების მქონე პროდუქტებით. თუმცა, იზიარებენ თუ არა მის კლიენტები ამ ენთუზიაზმს?

AWS-ის აღმასრულებელმა დირექტორმა, მეტ გარმანმა, თავის მთავარ მოხსენებაში აღიარა, რომ კომპანიებს ჯერ არ უნახავთ რეალური უკუგება ხელოვნურ ინტელექტში განხორციელებული ინვესტიციებიდან. თუმცა, მისი აზრით, ეს ვითარება მალე და სწრაფად შეიცვლება. „მჯერა, რომ AI აგენტების გამოჩენამ ხელოვნური ინტელექტის განვითარების გზაზე გარდამტეხ მომენტამდე მიგვიყვანა. ის ტექნიკური საოცრებიდან რეალური ღირებულების მომტან ინსტრუმენტად იქცევა. ამ ცვლილებას თქვენს ბიზნესზე ისეთივე გავლენა ექნება, როგორიც ინტერნეტს ან ღრუბლოვან ტექნოლოგიებს ჰქონდა“, — განაცხადა გარმანმა.

მიუხედავად იმისა, რომ ანალიტიკოსებზე AWS-ის ზოგიერთმა ტექნოლოგიურმა ანონსმა შთაბეჭდილება მოახდინა, ისინი არ არიან დარწმუნებულები, რომ ეს საკმარისი იქნება ბიზნესში ხელოვნური ინტელექტის დანერგვის ტემპის დასაჩქარებლად ან AI-ის ბაზარზე AWS-ის პოზიციების შესაცვლელად. AWS ღრუბლოვანი ინფრასტრუქტურის სფეროში ერთ-ერთი ლიდერია, თუმცა იგივეს თქმა რთულია მის კორპორატიულ AI პროდუქტებზე, სადაც Anthropic, OpenAI და Google ბაზრის მნიშვნელოვან წილს ფლობენ.

AWS-ის უპირატესობა ისაა, რომ მას ყველაფერი ერთ სივრცეში აქვს — ინფრასტრუქტურა და ხელოვნური ინტელექტის დასატრენინგებლად საჭირო საკუთარი ჩიპებიც კი. Forrester-ის მთავარი ანალიტიკოსი, ნავინ ჩჰაბრა, აღნიშნავს, რომ მიუხედავად საინტერესო ტექნოლოგიური სიახლეებისა, ბევრი კომპანია ჯერ კიდევ არ არის მზად AI-ის დასანერგად. „AWS-ის ანონსები აჩვენებს, რომ კომპანია წინ, შესაძლოა, მეტისმეტად წინ იყურება. საწარმოების უმეტესობა ჯერ კიდევ საპილოტე პროექტების დონეზეა და იშვიათად ფლობს იმ დონის სიმწიფეს, რასაც AWS მათგან ელის“, — წერს ჩჰაბრა.

ამ მოსაზრებას ამყარებს MIT-ის აგვისტოს კვლევა, რომლის მიხედვითაც, კომპანიების 95% ხელოვნურ ინტელექტში ჩადებული ინვესტიციებიდან უკუგებას ვერ ხედავს. Zacks Investment Research-ის სტრატეგი, ითან ფელერი, ამბობს, რომ მისთვის კვირის მთავარი მოვლენა არა ახალი AI მოდელები და აგენტები, არამედ ინფრასტრუქტურული სიახლეები იყო. „AWS AI factory-ის ინიციატივა, რომელიც კლიენტებს საშუალებას აძლევს, AWS-ის AI საკუთარ მონაცემთა ცენტრებში აამუშაონ, ნამდვილად შთამბეჭდავია“, — ამბობს ფელერი.

ფელერის აზრით, Amazon-ის მთავარი კომპეტენცია სწორედ ინფრასტრუქტურაშია და კომპანიამ აქცენტი ამ მიმართულებაზე უნდა გააკეთოს. ის თვლის, რომ AWS-ისთვის შესაძლოა უფრო გონივრული იყოს, საკუთარი AI ტექნოლოგიების ნაცვლად, ისეთ პარტნიორებთან ითანამშრომლოს, როგორებიც არიან Anthropic და Nvidia. ამ გზით კომპანია შეძლებს, გააძლიეროს თავისი პოზიციები ვერტიკალური AI-ის სფეროში.

ყოველივე ამის მიუხედავად, AWS-ს კარგი შესაძლებლობა აქვს, დაიმკვიდროს თავისი წილი AI სექტორში და პარალელურად, განაგრძოს ძირითადი ბიზნესის ზრდა. ღრუბლოვანი სერვისების ბაზარზე ლიდერობა მას მყარ ფინანსურ საფუძველს უქმნის, რაც ნაკლებად დამოკიდებულს ხდის AI ბაზრის ცვალებადობაზე. მესამე კვარტალში კომპანიის საოპერაციო შემოსავალმა 11.4 მილიარდი დოლარი შეადგინა, რაც მას ექსპერიმენტებისა და განვითარებისთვის დიდ სივრცეს აძლევს. ამიტომ, მაშინაც კი, თუ ბიზნესი დღეს არ არის მზად ახალი ტექნოლოგიებისთვის, AWS-მა მათ დახვეწაზე მუშაობა უნდა განაგრძოს.