ბრიტანელი კრიპტოგრაფი ადამ ბეკი უარყოფს New York Times-ის ცნობას, რომ ის ბიტკოინის შემქმნელი სატოში ნაკამოტოა

ბიტკოინის შემქმნელის, ფსევდონიმით სატოში ნაკამოტოს ვინაობა კვლავ ერთ-ერთ უდიდეს და ხანგრძლივ საიდუმლოდ რჩება. თუმცა, New York Times-ის მიერ გამოქვეყნებული ახალი გამოძიების თანახმად, სატოში შესაძლოა ბრიტანელი კრიპტოგრაფი ადამ ბეკი იყოს, რომელმაც ციფრული აქტივების სფეროში მნიშვნელოვანი ადრეული კვლევები ჩაატარა. თავად ბეკი ამ ვარაუდს კატეგორიულად უარყოფს.ბიტკოინის „მამის“ კვალს მკვლევრები ათწლეულების განმავლობაში უშედეგოდ ეძებენ. ბეკის უარყოფის გათვალისწინებით, რთული სათქმელია, რამდენად შორს წავიდა New York Times-ის ტექნოლოგიური ჟურნალისტი ჯონ კერიუ (რომელიც ცნობილია კომპანია Theranos-ის მხილებით), სხვა მკვლევრებთან შედარებით.ბეკი ნამდვილად შეესაბამება იმ ადამიანის პროფილს, რომელიც შესაძლოა პირველი კრიპტოვალუტის შექმნის უკან იდგეს. მან შექმნა Hashcash — სამუშაოს დადასტურების (proof-of-work) სისტემა, რომელსაც სატოში ბიტკოინის მაინინგისთვის იყენებდა. ამჟამად ბეკი Blockstream-ის თანადამფუძნებელი და აღმასრულებელი დირექტორია — კომპანიის, რომელიც ბლოკჩეინზე დაფუძნებული საგადახდო სისტემებისთვის ინფრასტრუქტურას აშენებს.ბეკი კერიუს იმასაც დაეთანხმა, რომ ის მართლაც „ლოგიკური ეჭვმიტანილია“ და სავარაუდოა, რომ სატოში — მის მსგავსად — 50 წლამდე ასაკის ბრიტანელი „საიფერპანკია“ (cypherpunk). ამ კონტექსტში, იაპონური ფსევდონიმის გამოყენება მართლაც უცნაურად გამოიყურება.თუმცა, კერიუს არ გააჩნია უტყუარი მტკიცებულება საქმის საბოლოოდ დასახურად. საკუთარი ვერსიის გასამყარებლად, მან 1992-დან 2008 წლამდე პერიოდის სამი კრიპტოგრაფიული ფორუმის (listservs) იმეილების არქივები შეაგროვა — სწორედ იმ პერიოდის, როდესაც სატოში ამ ფორუმებზე აქტიურობდა. კერიუმ არქივი ხელოვნურ ინტელექტს გადასცა, რათა სატოშისა და სხვა აქტიური მომხმარებლების წერის სტილს შორის საერთო ნიშნები ეპოვა.მაგალითად, სატოში რთულ არსებით სახელებში დეფისებს არ იყენებდა და ზოგჯერ ერთმანეთში ურევდა ინგლისურ სიტყვებს its და it’s. ანალიზის შედეგად, ადამ ბეკი საუკეთესო კანდიდატი აღმოჩნდა, თუმცა მან X-ზე დაწერა, რომ ეს მტკიცებულება მხოლოდ „დამთხვევაა და მსგავსი გამოცდილებისა და ინტერესების მქონე ადამიანებისთვის დამახასიათებელი ფრაზების ერთობლიობაა“.სატოშის საქმე კვლავ გახსნილია, თუმცა უნდა აღინიშნოს, რომ კერიუს მიერ ხელოვნური ინტელექტის გამოყენება საკმაოდ გონივრული ნაბიჯი იყო.