ChatGPT-ში ჩატების დაბლოკვის ფუნქცია დაემატა: როგორ დავიცვათ პირადი მიმოწერები

OpenAI-მ სამშაბათს გამოაცხადა, რომ მომხმარებლებს უკვე შეუძლიათ ChatGPT-ის კონკრეტული საუბრების დაბლოკვა. ეს ფუნქცია უზრუნველყოფს სენსიტიური მიმოწერების კონფიდენციალურობას იმ შემთხვევებში, როდესაც მოწყობილობაზე ან ეკრანზე წვდომა სხვა პირებსაც აქვთ.

მომხმარებლებს შეუძლიათ დაბლოკილი ჩატები ოთხნიშნა PIN კოდით დაიცვან, ან გამოიყენონ Face ID და Touch ID შესაბამისი მხარდაჭერის მქონე მოწყობილობებზე. „დროებითი ჩატებისგან“ (Temporary Chats) განსხვავებით, რომლებიც ცალკეულ სესიას ქმნიან და მიმოწერის ისტორიაში არ ჩნდებიან, დაბლოკილ ჩატებთან დაბრუნება მომხმარებელს ნებისმიერ დროს შეუძლია.

კომპანიის განმარტებით, ეს ფუნქცია შეიქმნა იმ სიტუაციებისთვის, როდესაც მომხმარებლები პირად საკითხებს განიხილავენ ან სიურპრიზს გეგმავენ და სურთ, რომ ეს საუბრები დაფარული დარჩეს მეგობრებისთვის ან ოჯახის წევრებისთვის მოწყობილობის გადაცემისას. ჩატების დაბლოკვა ChatGPT-ს კონფიდენციალურობის ახალ შრეს მატებს, რადგან აპლიკაცია სულ უფრო ხშირად გამოიყენება პირადი მიზნებისთვის.

ტექნიკური დეტალები და უსაფრთხოება

მიუხედავად იმისა, რომ ჩატის დაბლოკვა ზღუდავს მასზე წვდომას, ის არ ცვლის სენსიტიური ინფორმაციის შენახვისა თუ დამუშავების წესებს. OpenAI ხაზგასმით აღნიშნავს, რომ ჩატის დაბლოკვა არ გულისხმობს შემდეგს:

• ბოლოდან ბოლომდე დაშიფვრის (end-to-end encryption) შექმნას ან ცალკეულ დაშიფრულ საცავს;
• მონაცემების შენახვის ვადის შეცვლას;
• იმ ინფორმაციის წაშლას, რომელიც ChatGPT-მ ჩატის დაბლოკვამდე დაიმახსოვრა;
• პარამეტრის „მოდელის გაუმჯობესება ყველასთვის“ (Improve the model for everyone) შეცვლას.

ჩატის დაბლოკვის შემდეგ, ის გადადის სპეციალურ სექციაში „Locked Chats“, სადაც ის განცალკევებულია ჩვეულებრივი ისტორიისგან, მიპინული საუბრებისგან და ძიების შედეგებისგან.

მეხსიერების ფუნქცია და მონაცემთა იზოლაცია

თუ „მეხსიერების“ (Memory) ფუნქცია გააქტიურებულია, დაბლოკილ ჩატებს აქვთ საკუთარი, დამოუკიდებელი მეხსიერება, რომელიც მხოლოდ ამ სექციის შიგნით არსებულ საუბრებს შორის ზიარდება. დაბლოკვის შემდეგ გაგზავნილი ახალი შეტყობინებები ანახლებს მხოლოდ ამ სპეციფიკურ მეხსიერებას და არ მოქმედებს ძირითად მეხსიერებაზე. ეს ნიშნავს, რომ დაბლოკილი ჩატებიდან მიღებული ახალი ინფორმაცია ჩვეულებრივ მიმოწერებში არ „გაჟონავს“.

მნიშვნელოვანი შეზღუდვები და ხელმისაწვდომობა

OpenAI-ს განცხადებით, PIN კოდის აღდგენა (reset) იწვევს ყველა დაბლოკილი ჩატის, ფაილისა და სხვა დაცული კონტენტის სამუდამოდ წაშლას, რომელიც წინა კოდით იყო დაცული. გარდა ამისა, ჩატის დაბლოკვის ოფცია არ არის ხელმისაწვდომი შემდეგი შემთხვევებისთვის:

• დროებითი ჩატები (temporary chats);
• დაარქივებული ჩატები (archived chats);
• ჯგუფური ჩატები (group chats);
• გაზიარებული ბმულით შექმნილი ჩატები;
• დაგეგმილი დავალებების მქონე ჩატები;
• შეხვედრების ჩანაწერების მქონე ჩატები.

დაბლოკილი ჩატების ფუნქცია ხელმისაწვდომი იქნება ChatGPT Free, Go, Plus, Pro, Business, Enterprise და Edu გეგმების მომხმარებლებისთვის. კომპანია აღნიშნავს, რომ ფუნქცია არ არის ხელმისაწვდომი ChatGPT for Healthcare პლატფორმაზე. ფუნქციის დანერგვა სამშაბათს დაიწყო, ამიტომ შესაძლოა ის ყველა მომხმარებლისთვის ჯერ კიდევ არ იყოს გააქტიურებული.