ჩრდილოეთ კორეელი ჰაკერები Bitget-იდან 351 მილიონი დოლარის მოპარვაში არიან ეჭვმიტანილები: ეს წლის უმსხვილესი კიბერშეტევაა

ჩრდილოეთ კორეელი ჰაკერები ეჭვმიტანილები არიან კრიპტოვალუტის ბირჟა Bitget-ის სერვერებიდან 351 მილიონ დოლარზე მეტის მოპარვაში. ხუთშაბათს მომხდარი კიბერშეტევა კრიპტოსექტორზე განხორციელებული მაღალი პროფილის ჰაკერული თავდასხმების სერიის ბოლო შემთხვევაა.ეს მიმდინარე წლის ციფრული ვალუტის ყველაზე მასშტაბური ძარცვაა. მან გადააჭარბა სექტემბერში მომხდარ 340 მილიონი დოლარის ოდენობის ჰაკერულ შეტევას, რომლის დროსაც ჰაკერმა მოპარული თანხიდან 47 მილიონი დოლარის გარდა ყველაფერი დააბრუნა.ხუთშაბათსა და პარასკევს სოციალურ ქსელ X-ზე გამოქვეყნებულ პოსტებში Bitget-მა განაცხადა, რომ უსაფრთხოების დარღვევა დაკავშირებული იყო კრიპტოვალუტის უნებართვო გადარიცხვებთან მისი „ცხელი საფულეებიდან“ (hot wallets). აღნიშნული საფულეები დაკავშირებულია ინტერნეტთან და განკუთვნილია აქტიური ვაჭრობისთვის. მომხდარის გამო, Bitget-მა თავის ქსელში კრიპტოვალუტის გატანის პროცესი დროებით შეაჩერა.კომპანიის განცხადებით, მათ მომხმარებელთა დაცვის ფონდში 464 მილიონი დოლარი აქვთ, რაც სრულად უნდა ფარავდეს მოპარული თანხით გამოწვეულ ზარალს. Bitget-ის აღმასრულებელმა დირექტორმა, გრეისი ჩენმა (Gracy Chen) აღნიშნა, რომ უსაფრთხოების დარღვევა და ძარცვის მეთოდი „სრულად შეესაბამება ჩრდილოეთ კორეის ჰაკერული ორგანიზაციების ცნობილ ხელწერას“.მსგავსი დაჯგუფებები ხშირად ფიგურირებენ კრიპტოვალუტის ქურდობებში. არსებობს ეჭვი, რომ ისინი მიზანმიმართულად უტევენ ღია კოდის მქონე პროგრამულ უზრუნველყოფას (open source software) მსხვერპლთა მასობრივი დაჰაკვის მიზნით, რათა მოპოვებული თანხებით ქვეყნის ბირთვული იარაღის პროგრამა დააფინანსონ.ბლოკჩეინ-ანალიტიკური ფირმის, TRM Labs-ის მონაცემებით, 2026 წელს განხორციელებული კრიპტოქურდობების დაახლოებით სამი მეოთხედის უკან სწორედ ჩრდილოეთ კორეა დგას. ჩენს არ დაუკონკრეტებია, თუ როდის აღდგება Bitget-ზე თანხის გატანის ფუნქცია.