ჩრდილოეთ კორეელი ჯაშუშები დისტანციურ თანამშრომლებად ასობით კომპანიაში შეაღწიეს

უსაფრთხოების კომპანია CrowdStrike-ის მკვლევრების ინფორმაციით, ბოლო წლის განმავლობაში მკვეთრად გაიზარდა შემთხვევები, როდესაც ჩრდილოეთ კორეელები დისტანციური IT სპეციალისტების სახით დასავლურ კომპანიებში აღწევენ რეჟიმისთვის თანხების მოსაპოვებლად.

კომპანიის უახლესი ანგარიშის თანახმად, გასულ წელთან შედარებით 220%-ით გაიზარდა ასეთი ინციდენტების რაოდენობა და 320-ს მიაღწია. ჩრდილოეთ კორეელები იყენებენ ყალბ პირადობებს, რეზიუმეებს და სამუშაო გამოცდილებას, რათა დასაქმდნენ და მოიპოვონ თანხები რეჟიმისთვის.

სქემის მიზანია დაფინანსება მოუპოვოს ჩრდილოეთ კორეის სანქცირებულ ბირთვულ პროგრამას, რომელმაც დღემდე მილიარდობით დოლარი მოუტანა რეჟიმს. ზუსტად უცნობია, რამდენი ჩრდილოეთ კორეელი IT სპეციალისტი მუშაობს ამჟამად ამერიკულ კომპანიებში, თუმცა სავარაუდოდ ეს რიცხვი ათასებში იზომება.

CrowdStrike-ის მიხედვით, ჩრდილოეთ კორეელი IT მუშაკები, რომლებსაც კომპანია "Famous Chollima"-ს უწოდებს, იყენებენ ხელოვნურ ინტელექტს რეზიუმეების შესადგენად და გარეგნობის შესაცვლელად დისტანციური გასაუბრებების დროს.

აშშ-ის იუსტიციის დეპარტამენტი ცდილობს ამ ოპერაციების შეფერხებას იმ ამერიკელი შუამავლების დევნით, რომლებიც ეხმარებიან სქემის მუშაობას. ერთ-ერთი ასეთი ოპერაცია მოიცავდა "ლეპტოპების ფერმების" გამოვლენას, სადაც ჩრდილოეთ კორეელები მუშაობდნენ ისე, თითქოს აშშ-ში იმყოფებოდნენ.

2021-2024 წლებში ერთმა ჩრდილოეთკორეულმა ოპერაციამ 80 ამერიკელის პირადი მონაცემები მოიპარა და 100-ზე მეტ ამერიკულ კომპანიაში დისტანციური სამუშაოს მისაღებად გამოიყენა.