Disney-მ პირველ ტექნოლოგიურ დირექტორად იმ AI სტარტაპის ყოფილი ხელმძღვანელი დანიშნა, რომელსაც ადრე სასამართლოში უჩიოდა

Disney-მ ისტორიაში პირველად მთავარი ტექნოლოგიური დირექტორი (CTO) დაიქირავა. საინტერესოა, რომ ახალი ხელმძღვანელი სწორედ იმ ხელოვნური ინტელექტის სტარტაპიდან მოდის, რომელსაც „ჯადოსნური სამეფო“ ადრე ინტელექტუალური საკუთრების დარღვევაში ადანაშაულებდა.კარანდიპ ანანდი Character.AI-ს ყოფილი გენერალური დირექტორია. აღნიშნული კომპანია 2021 წელს დაარსების დღიდან არაერთ სამართლებრივ დავასა და პრობლემას წააწყდა. ერთ-ერთი ასეთი შემთხვევა 2025 წლის სექტემბერში მოხდა, როდესაც Disney-მ სტარტაპს ოფიციალური გაფრთხილება გაუგზავნა და საავტორო უფლებებით დაცული პერსონაჟების უკანონოდ გამოყენების შეწყვეტა მოსთხოვა.Character.AI მომხმარებლებს საშუალებას აძლევს, გენერაციული ხელოვნური ინტელექტის მეშვეობით შექმნან უნიკალური ვირტუალური პერსონაჟები და მათთან ინტერაქცია დაამყარონ. Disney მანამდე ამტკიცებდა, რომ პლატფორმაზე განთავსებული იყო მისი ფრენჩაიზების კუთვნილი, საავტორო უფლებებით დაცული პერსონაჟები. Disney-ს ბრალდებების გარდა, Character.AI-ს წინააღმდეგ სარჩელი იმის გამოც არის შეტანილი, რომ კომპანიის ჩატბოტები მომხმარებლებს თვითდაზიანებისა და სუიციდისკენ მოუწოდებდნენ.Variety-ს ინფორმაციით, ანანდი ამ პოზიციაზე Disney-ს ახალმა გენერალურმა დირექტორმა, ჯოშ დ’ამარომ შეარჩია, რომელმაც პოსტი მარტში ბობ აიგერის გადადგომის შემდეგ დაიკავა. აღნიშნული დანიშვნა მიანიშნებს, რომ დ’ამაროს სურს კომპანიამ აქტიურად აითვისოს და დანერგოს ახალი ტექნოლოგიები.LinkedIn-ის პროფილის მიხედვით, ანანდი 2025 წლის მაისში გენერალური დირექტორის პოსტის დაკავებამდე Character-ის საბჭოს მრჩეველი იყო. მანამდე, 2015-დან 2021 წლამდე ის Facebook-ში მუშაობდა, ხოლო მანამდე 15 წელი Microsoft-ში გაატარა.