Gemini-მ ChatGPT-ს App Store-ში გაუსწრო: Nano Banana AI მოდელმა ჩამოტვირთვები 45%-ით გაზარდა

Google-ის ხელოვნური ინტელექტის აპლიკაცია Gemini მნიშვნელოვან წარმატებას აღწევს მას შემდეგ, რაც აგვისტოში Nano Banana სურათების რედაქტირების მოდელი გამოუშვა. მომხმარებლები განსაკუთრებით აფასებენ რთული რედაქტირების და რეალისტური გამოსახულებების შექმნის გამარტივებულ შესაძლებლობებს.

აპლიკაციების ანალიტიკური კომპანია Appfigures-ის მონაცემებით, სექტემბერში Gemini-ის ჩამოტვირთვების რაოდენობა წინა თვესთან შედარებით 45%-ით გაიზარდა. თვის პირველ ნახევარში უკვე 12.6 მილიონი ჩამოტვირთვა დაფიქსირდა, მაშინ როცა აგვისტოში ეს მაჩვენებელი 8.7 მილიონს შეადგენდა.

სექტემბრის 12 რიცხვიდან Gemini აშშ-ის App Store-ში პირველ ადგილს იკავებს, რითაც ChatGPT მეორე პოზიციაზე გადაინაცვლა. აპლიკაცია ასევე მოხვდა ტოპ-5 iPhone აპების სიაში 108 ქვეყანაში. Google Play-ზე კი Gemini სექტემბრის 8-დან მე-2 ადგილზეა, თუმცა ChatGPT კვლავ ლიდერობს.

Google-ის ვიცე-პრეზიდენტის, ჯოშ ვუდვარდის განცხადებით, Nano Banana-ს გამოშვების შემდეგ აპლიკაციას 23 მილიონი ახალი მომხმარებელი შეემატა, რომლებმაც ჯამში 500 მილიონზე მეტი სურათი გააზიარეს.

მნიშვნელოვნად გაიზარდა აპლიკაციის შემოსავლებიც. iOS პლატფორმაზე მხოლოდ აგვისტოში Gemini-მ $1.6 მილიონი გამოიმუშავა, რაც იანვრის მაჩვენებელზე ($115,000) 1,291%-ით მეტია. 2024 წლის თებერვალში Android-ზე გამოშვების შემდეგ, აპლიკაცია ჯამში 185.4 მილიონჯერ ჩამოიტვირთა.