Google-ი ხელოვნური ინტელექტის მეშვეობით შექმნილ რეკლამებს სპეციალურ მარკირებას დაურთავს

Google-ი ახალ ფუნქციას ნერგავს, რომელიც მომხმარებლებს იმის გარკვევაში დაეხმარება, არის თუ არა მათ მიერ ნანახი რეკლამა ხელოვნური ინტელექტის (AI) გამოყენებით შექმნილი. ხელოვნური ინტელექტი ბიზნესებს რეკლამების მომზადებასა და ბრენდის პროდუქციის სხვადასხვა გარემოში განთავსებას უადვილებს, რაც ელექტრონული კომერციისთვის საჭირო რეალურ ფოტოგადაღებებზე გაწეულ ხარჯებს მნიშვნელოვნად ამცირებს.

თუმცა, მსგავსი მიდგომა შესაძლოა შეცდომაში შემყვანი აღმოჩნდეს, თუ მომხმარებელმა არ იცის, რომ მის წინაშე არა რეალური ფოტო, არამედ სინთეტიკური გამოსახულებაა. მიუხედავად იმისა, რომ Google-ი კრძალავს ყალბ და მანიპულაციურ რეკლამებს, სარეკლამო მასალებში მაინც დასაშვებია ხელოვნური ინტელექტის გამოყენება ციფრულად შეცვლილი კონტენტის შესაქმნელად. აქამდე კომპანია მსგავს გამჭვირვალობას მხოლოდ პოლიტიკური და წინასაარჩევნო რეკლამების შემთხვევაში ითხოვდა.

ტექნოლოგიური გიგანტის განცხადებით, მომხმარებლისთვის განკუთვნილი ეს ახალი ფუნქცია დაემატება „ჩემი სარეკლამო ცენტრის“ (My Ad Center) პანელს. მასზე წვდომა ნებისმიერ მომხმარებელს შეეძლება სამწერტილიან მენიუზე ან ინფორმაციის ხატულაზე (info icon) დაწკაპუნებით იმ რეკლამებში, რომლებიც Google Search-ის, YouTube-ისა და Google Discover-ის პლატფორმებზე ჩნდება.

როგორ მუშაობს ახალი ფუნქცია

აღნიშნული პანელი მომხმარებლებს აქამდეც აძლევდა საშუალებას, დაებლოკათ ან დაარეპორტებინათ რეკლამები, გაეგოთ მეტი რეკლამის განმთავსებლის შესახებ ან გაერკვიათ, თუ რატომ აჩვენეს მათ კონკრეტული რეკლამა. ახლა კი მომხმარებლები იხილავენ დამატებით ოფციას — „როგორ შეიქმნა ეს რეკლამა“ (How this ad was made), რომელიც მიუთითებს, არის თუ არა რეკლამა შექმნილი ან რედაქტირებული ხელოვნური ინტელექტის გამოყენებით.

Google-ის განმარტებით, მარკირების პროცესი შემდეგნაირად წარიმართება:

• თუ რეკლამის განმთავსებელი რეკლამის შესაქმნელად Google-ის გენერაციულ AI ინსტრუმენტებს იყენებს, ინფორმაციის გამჟღავნება ავტომატურად ჩაირთვება.
• თუ რეკლამა სხვა პლატფორმების მეშვეობით არის შექმნილი, განმთავსებელს მოუწევს ახალი მართვის საშუალების გამოყენება, რათა თავად მიუთითოს AI-ის მონაწილეობის შესახებ.

მნიშვნელოვანია აღინიშნოს, რომ Google-ი თავად არ განახორციელებს შემოწმებას იმის დასადგენად, გამოყენებულია თუ არა ხელოვნური ინტელექტი გარე პლატფორმებზე შექმნილ რეკლამებში. გარდა ამისა, გარკვეულ ბაზრებზე რეკლამას შესაძლოა დაემატოს AI-ის აღმნიშვნელი იარლიყი, თუ ამას ადგილობრივი კანონმდებლობა მოითხოვს.