Google-მა URL შემოკლების სერვისის გაუქმების გეგმა ნაწილობრივ შეცვალა

Google-მა მნიშვნელოვანი ცვლილება შეიტანა goo.gl URL შემოკლების სერვისთან დაკავშირებულ გადაწყვეტილებაში. კომპანიამ გადაწყვიტა, რომ აქტიურად გამოყენებული ბმულები კვლავაც ფუნქციონირებას განაგრძობენ.

კომპანიის მონაცემებით, შემოკლებული URL-ების 99% საერთოდ არ იღებს ვიზიტორებს. თავდაპირველად Google გეგმავდა 2025 წლის 25 აგვისტოდან ყველა შემოკლებული ბმულის მხარდაჭერის შეწყვეტას, თუმცა მომხმარებელთა უკუკავშირის შემდეგ გეგმები შეიცვალა.

აღსანიშნავია, რომ 2018 წელს Google-მა უკვე შეწყვიტა ახალი URL-ების შემოკლების მომსახურება, თუმცა არსებული ბმულების მხარდაჭერა გააგრძელა. ახალი გადაწყვეტილების თანახმად, მხოლოდ იმ ბმულების მხარდაჭერა შეწყდება, რომლებსაც ვიზიტორები არ ჰყავთ.

Google-ის განცხადების თანახმად: "მიუხედავად იმისა, რომ თავდაპირველად ვგეგმავდით ყველა goo.gl URL-ის მხარდაჭერის შეწყვეტას 2025 წლის 25 აგვისტოს შემდეგ, ჩვენ შევცვალეთ მიდგომა აქტიურად გამოყენებული ბმულების შესანარჩუნებლად. გვესმის, რომ ეს ბმულები ჩაშენებულია უამრავ დოკუმენტში, ვიდეოში, პოსტში და სხვა მასალებში".

თუ მომხმარებელი ბმულზე გადასვლისას ხედავს შეტყობინებას "ეს ბმული აღარ იმუშავებს უახლოეს მომავალში", რეკომენდებულია სხვა URL შემამოკლებელ სერვისზე გადასვლა. ყველა დანარჩენი goo.gl ბმული კი ჩვეულებრივად განაგრძობს ფუნქციონირებას.