Google Photos-ის ახალი ფუნქცია საკუთარი ფოტოებით მემების შექმნის საშუალებას იძლევა

Google Photos მომხმარებლებს საკუთარი ფოტოების გამოყენებით მემების შექმნის შესაძლებლობას სთავაზობს. ხუთშაბათს კომპანიამ წარადგინა გენერაციულ ხელოვნურ ინტელექტზე დაფუძნებული ახალი ფუნქცია სახელწოდებით „Me Meme“. ეს ინსტრუმენტი მომხმარებლებს საშუალებას აძლევს, გააერთიანონ მემის შაბლონი და საკუთარი გამოსახულება ახალი, სახალისო ფოტოს შესაქმნელად.

ახალი ფუნქცია თავდაპირველად ხელმისაწვდომი იქნება აშშ-ში მცხოვრები მომხმარებლებისთვის. მის არსებობაზე ინფორმაცია პირველად გასული წლის ოქტომბერში ბლოგმა Android Authority-მ გაავრცელა, ოფიციალურად კი Google-მა სიახლე Photos Community-ის პლატფორმაზე დაადასტურა.

Google-ის განმარტებით, აღნიშნული ფუნქცია ექსპერიმენტულია, ამიტომ გენერირებული გამოსახულებები შესაძლოა „ზუსტად არ ემთხვეოდეს ორიგინალ ფოტოს“. საუკეთესო შედეგის მისაღებად რეკომენდებულია კარგად განათებული, ფოკუსირებული და პირდაპირ გადაღებული (front-facing) ფოტოების გამოყენება. ეს სიახლე მიზნად ისახავს მომხმარებლებისთვის ფოტოების დათვალიერების პროცესის გახალისებას და Google-ის Gemini AI ტექნოლოგიის, კერძოდ კი Nano Banana-ს შესაძლებლობების დემონსტრირებას.

Google-ის პოპულარული ხელოვნური ინტელექტის მოდელი Google Photos აპლიკაციაში სხვა ფუნქციებსაც მართავს, როგორიცაა ფოტოების ახალ სტილში — მაგალითად, მულტფილმის ან ნახატის სახით — გარდაქმნა. მიუხედავად იმისა, რომ „Me Meme“ გასართობი ხასიათისაა, მსგავსი ფუნქციები მომხმარებლებს მოუწოდებს, ხშირად დაუბრუნდნენ Photos აპლიკაციას და გამოიყენონ AI ინსტრუმენტები კონკურენტი პროდუქტების ნაცვლად. გარდა ამისა, მომხმარებლები ხშირად იჩენენ ინტერესს ისეთი ფუნქციების მიმართ, რომლებიც მათ საკუთარი თავის AI დამუშავებით ნახვის საშუალებას აძლევს. მსგავსი ტენდენცია გამოიკვეთა OpenAI-ის Sora აპლიკაციის შემთხვევაშიც, რომელიც მომხმარებლებს საკუთარი თავისა და მეგობრების მონაწილეობით AI ვიდეოების შექმნის საშუალებას აძლევს.

როგორ გამოვიყენოთ Me Meme ფუნქცია

„Me Meme“ ფუნქცია ჯერჯერობით სრულად არ არის დანერგილი, ამიტომ შესაძლოა ის განახლებულ Google Photos აპლიკაციაში მაშინვე არ გამოჩნდეს. Google-ის წარმომადგენლის განცხადებით, ფუნქცია აშშ-ში iOS და Android მომხმარებლებისთვის უახლოესი კვირების განმავლობაში გახდება ხელმისაწვდომი.

ფუნქციის გამოსაყენებლად საჭიროა შემდეგი ნაბიჯების შესრულება:

1. გადადით აპლიკაციის ჩანართზე „Create“ (შექმნა).
2. აირჩიეთ სასურველი შაბლონი ან ატვირთეთ საკუთარი.
3. დააჭირეთ ღილაკს „add photo“ (ფოტოს დამატება).
4. დააჭირეთ „Generate“ (გენერირება).

Google აღნიშნავს, რომ დროთა განმავლობაში შაბლონების რაოდენობა გაიზრდება. მას შემდეგ, რაც ხელოვნური ინტელექტი გამოსახულებას შექმნის, მომხმარებელს შეუძლია ფოტო შეინახოს, გააზიაროს სხვა პლატფორმებზე ან დააჭიროს ღილაკს „regenerate“ (ხელახალი გენერირება) ახალი ვარიანტის მისაღებად.