ხელოვნური ინტელექტის ბუმი: როგორ აფერხებს მონაცემთა ცენტრების მშენებლობა გზებისა და ხიდების განახლებას

ხელოვნური ინტელექტის ტექნოლოგიების განვითარებასთან ერთად, მონაცემთა ცენტრების მშენებლობა ისეთი ტემპით იზრდება, რომ შესაძლოა, გზების, ხიდებისა და სხვა მნიშვნელოვანი ინფრასტრუქტურული პროექტების განხორციელებას საფრთხე შეუქმნას. Bloomberg-ის ინფორმაციით, ეს ორი სექტორი ერთმანეთს მუშახელისა და რესურსებისთვის ეცილება.

არსებული მონაცემებით, 2025 წელს შტატებისა და ადგილობრივი მთავრობების მიერ გაყიდული ვალის მოცულობამ ზედიზედ მეორე წელია რეკორდულ ნიშნულს მიაღწია. სტრატეგოსები პროგნოზირებენ, რომ მომავალ წელს დამატებით 600 მილიარდი დოლარის ღირებულების ვალი გაიყიდება. ამ თანხის უდიდესი ნაწილი სწორედ ინფრასტრუქტურული პროექტების დაფინანსებას უნდა მოხმარდეს.

ამ ფონზე, აშშ-ის მოსახლეობის აღწერის ბიუროს მონაცემებით, კერძო სექტორის დანახარჯები მონაცემთა ცენტრების მშენებლობაზე წლიურად 41 მილიარდ დოლარს აჭარბებს. ეს მაჩვენებელი თითქმის იდენტურია იმ თანხისა, რასაც შტატებისა და ადგილობრივი მთავრობები სატრანსპორტო ინფრასტრუქტურის მშენებლობაზე ხარჯავენ.

პრობლემას ისიც ამწვავებს, რომ ყველა ეს პროექტი სამშენებლო მუშახელისთვის იბრძვის იმ დროს, როდესაც ინდუსტრია ისედაც კადრების დეფიციტს განიცდის. ამის მიზეზად თანამშრომლების საპენსიო ასაკს და პრეზიდენტ დონალდ ტრამპის ადმინისტრაციის მიერ საიმიგრაციო პოლიტიკის გამკაცრებას ასახელებენ.

არქიტექტურული და დიზაინის პროგრამული უზრუნველყოფის მწარმოებელი კომპანია Autodesk-ის აღმასრულებელი დირექტორი, ენდრიუ ანაგნოსტი, Bloomberg-თან საუბარში აცხადებს, რომ „აბსოლუტურად ეჭვგარეშეა“, მონაცემთა ცენტრების მშენებლობა „რესურსებს ართმევს სხვა პროექტებს“. „გარანტიას გაძლევთ, ბევრი [ინფრასტრუქტურული] პროექტი ისე სწრაფად ვერ განხორციელდება, როგორც ხალხს სურს“, - დასძინა მან.