Lambda და Microsoft-ი ხელოვნური ინტელექტის ინფრასტრუქტურისთვის მრავალმილიარდიან გარიგებას აფორმებენ

ღრუბლოვანი გამოთვლების კომპანია Lambda-მ Microsoft-თან პარტნიორობა ახალ ეტაპზე გადაიყვანა ხელოვნური ინტელექტის ინფრასტრუქტურის სფეროში დადებული მასშტაბური გარიგებით. Nvidia-ს მიერ მხარდაჭერილმა Lambda-მ ორშაბათს განაცხადა, რომ Microsoft-თან მრავალმილიარდიანი შეთანხმება გააფორმა, რომელიც ათიათასობით Nvidia-ს გრაფიკული პროცესორის (GPU) განთავსებას ითვალისწინებს.

გარიგების ზუსტი ფინანსური მოცულობა არ სახელდება, თუმცა ცნობილია, რომ გადაცემული GPU-ების ნაწილი უახლესი Nvidia GB300 NVL72 სისტემები იქნება, რომელთა გამოშვებაც მიმდინარე წელს დაიწყო. „შესანიშნავია იმის ხილვა, თუ როგორ მუშაობენ Microsoft-ისა და Lambda-ს გუნდები ერთად ამ მასიური AI სუპერკომპიუტერების შესაქმნელად“, - განაცხადა Lambda-ს აღმასრულებელმა დირექტორმა, სტივენ ბალაბანმა.

სტივენ ბალაბანის თქმით, მისი კომპანია Microsoft-თან რვა წელზე მეტია თანამშრომლობს და ეს შეთანხმება მათი ურთიერთობის ფენომენალური შემდგომი ნაბიჯია. აღსანიშნავია, რომ Microsoft-მა პირველი Nvidia GB300 NVL72 კლასტერი მიმდინარე წლის ოქტომბერში გახსნა. Lambda, რომელიც 2012 წელს, ხელოვნური ინტელექტის ამჟამინდელ ბუმამდე დიდი ხნით ადრე დაარსდა და 1.7 მილიარდი დოლარის ვენჩურული კაპიტალი მოიზიდა, ამჟამად უდიდეს მოთხოვნას აწყდება.

ეს განცხადება Microsoft-ის მიერ ავსტრალიურ მონაცემთა ცენტრ IREN-თან ხელოვნური ინტელექტის ღრუბლოვანი სიმძლავრეების შესაძენად 9.7 მილიარდი დოლარის ღირებულების გარიგების დადებიდან რამდენიმე საათში გაკეთდა. ამავე პერიოდში, OpenAI-მ Amazon-თან 38 მილიარდი დოლარის ღირებულების შეთანხმება გააფორმა, რომელიც მომდევნო შვიდი წლის განმავლობაში ღრუბლოვანი სერვისების შესყიდვას გულისხმობს. გავრცელებული ინფორმაციით, სექტემბერში OpenAI-მ Oracle-თან, სავარაუდოდ, 300 მილიარდი დოლარის გარიგებაც დადო.

Amazon Web Services (AWS) აცხადებს, რომ ბოლო სამი წლის განმავლობაში საოპერაციო შემოსავლის თვალსაზრისით საუკეთესო წელი უდგას. Amazon-ის ამ დეპარტამენტმა მიმდინარე წელს უკვე 33 მილიარდი დოლარის შემოსავალი მიიღო. „AWS იზრდება ისეთი ტემპით, როგორიც 2022 წლის შემდეგ არ გვინახავს და წლიური ზრდა 20.2%-მდე დაჩქარდა“, - განაცხადა Amazon-ის პრეზიდენტმა, ენდი ჯესიმ. მისი თქმით, კომპანია ხედავს მზარდ მოთხოვნას AI-სა და საბაზისო ინფრასტრუქტურაზე და ბოლო 12 თვის განმავლობაში 3.8 გიგავატზე მეტი სიმძლავრე დაამატა.