მეინის გუბერნატორმა მონაცემთა ცენტრების მშენებლობაზე მორატორიუმის დაწესებას ვეტო დაადო

მეინის გუბერნატორმა, ჯანეტ მილსმა, ვეტო დაადო კანონპროექტს, რომელიც ახალი მონაცემთა ცენტრების მშენებლობისთვის ნებართვების გაცემის დროებით შეჩერებას ითვალისწინებდა. აღნიშნული გადაწყვეტილებით, შტატში თავიდან იქნა აცილებული შეზღუდვა, რომელიც ამ სფეროში საქმიანობას გარკვეული ვადით შეაფერხებდა.
კანონპროექტი L.D. 307-ის ძალაში შესვლის შემთხვევაში, მეინი გახდებოდა პირველი შტატი აშშ-ში, სადაც მონაცემთა ცენტრების მშენებლობაზე საყოველთაო მორატორიუმი დაწესდებოდა. შეზღუდვა 2027 წლის 1 ნოემბრამდე უნდა გაგრძელებულიყო. გარდა ამისა, ინიციატივა ითვალისწინებდა 13 წევრისგან შემდგარი საბჭოს შექმნას, რომელსაც მონაცემთა ცენტრების მშენებლობის საკითხები უნდა შეესწავლა და შესაბამისი რეკომენდაციები შეემუშავებინა.
მონაცემთა ცენტრების მიმართ საზოგადოებრივი უკმაყოფილების ზრდის ფონზე, მსგავსი მორატორიუმების დაწესებას სხვა შტატებიც, მათ შორის ნიუ-იორკიც განიხილავენ. შტატის საკანონმდებლო ორგანოსთვის გაგზავნილ წერილში გუბერნატორმა მილსმა — რომელიც ამჟამად აშშ-ის სენატორობის კანდიდატია — აღნიშნა, რომ ახალი პროექტების შეჩერება „მიზანშეწონილი იქნებოდა, თუ გავითვალისწინებთ სხვა შტატებში არსებული მასშტაბური მონაცემთა ცენტრების გავლენას გარემოსა და ელექტროენერგიის ტარიფებზე“.
მიუხედავად ამისა, გუბერნატორმა განმარტა, რომ ის ხელს მოაწერდა კანონპროექტს, მასში ქალაქ ჯეიში (Town of Jay) დაგეგმილი მონაცემთა ცენტრის პროექტისთვის გამონაკლისი რომ ყოფილიყო დაშვებული. მილსის განცხადებით, აღნიშნული პროექტი „ადგილობრივი თემისა და რეგიონის მხრიდან ძლიერი მხარდაჭერით სარგებლობს“, რაც მისი ვეტოს ერთ-ერთი მთავარი მიზეზი გახდა.