Meta-მ Apple-ის დიზაინის მთავარი ხელმძღვანელი გადაიბირა Reality Labs-ის ახალი სტუდიისთვის

ალან დაი, დიზაინის ხელმძღვანელი, რომელიც ბოლო ათწლეულის განმავლობაში Apple-ის მომხმარებლის ინტერფეისის გუნდს ხელმძღვანელობდა, კომპანიას ტოვებს და Meta-ს უერთდება. Bloomberg-ის მარკ გურმანის ინფორმაციით, ეს Meta-სთვის მნიშვნელოვანი შენაძენია, რადგან კომპანია აქტიურად მუშაობს სამომხმარებლო მოწყობილობების, როგორიცაა სმარტ სათვალეები და ვირტუალური რეალობის გარნიტურები, განვითარებაზე.

ახალ პოზიციაზე დაი ფოკუსირებული იქნება ამ მოწყობილობებში ხელოვნური ინტელექტის ფუნქციების გაუმჯობესებაზე და უშუალოდ კომპანიის მთავარ ტექნოლოგიურ დირექტორს, ენდრიუ ბოსვორთს დაექვემდებარება. Apple-ში მის ადგილს სტივ ლემეი დაიკავებს, რომელსაც, Apple-ის აღმასრულებელი დირექტორის, ტიმ კუკის თქმით, „1999 წლიდან მოყოლებული Apple-ის ყველა ძირითადი ინტერფეისის დიზაინში საკვანძო როლი ჰქონდა“.

როგორც ჩანს, Meta აქტიურად იზიდავს კადრებს კონკურენტი კომპანიებიდან, რათა ხელოვნური ინტელექტის რბოლაში პოზიციები გაიმყაროს. ამ ზაფხულს Meta-მ OpenAI-დანაც გადაიბირა მკვლევრები. გავრცელებული ინფორმაციით, Meta-ს დირექტორმა, მარკ ცუკერბერგმა, ერთ-ერთ თანამშრომელს გადაბირების მიზნით პირადად მიუტანა სახლში მომზადებული სუპი. ამაზე საპასუხოდ, OpenAI-ის კვლევების მთავარმა ოფიცერმა, მარკ ჩენმა, განაცხადა, რომ მანაც მიუტანა საკუთარი სუპი Meta-ს პერსპექტიულ თანამშრომლებს.

დაის წასვლის შესახებ ახალი ამბის გავრცელებიდან მალევე, ცუკერბერგმა Reality Labs-ის ფარგლებში ახალი კრეატიული სტუდიის შექმნა დააანონსა, რომელსაც სწორედ ალან დაი უხელმძღვანელებს. მას შეუერთდებიან ბილი სორენტინო, Apple-ის კიდევ ერთი ყოფილი დიზაინერი, რომელიც Reality Labs-ში ინტერფეისის დიზაინს ხელმძღვანელობდა, და ჯოშუა ტო, რომელიც ასევე ამ მიმართულებას კურირებდა. სტუდიაში ასევე გაერთიანდებიან Meta-ს ინდუსტრიული დიზაინის გუნდი პიტ ბრისტოლის ხელმძღვანელობით და მეტავერსის დიზაინისა და არტის გუნდები ჯეისონ რუბინის მეთაურობით.

ცუკერბერგის თქმით, სტუდია „გააერთიანებს დიზაინს, მოდასა და ტექნოლოგიას, რათა ჩვენი პროდუქტებისა და გამოცდილების მომავალი თაობა განსაზღვროს“. „ჩვენი იდეაა, ინტელექტი განვიხილოთ, როგორც ახალი დიზაინ მასალა და წარმოვიდგინოთ, რა ხდება შესაძლებელი, როდესაც ის უხვი, ქმედითი და ადამიანზე ორიენტირებულია“, - დაწერა Meta-ს ხელმძღვანელმა Threads-ზე.

„ჩვენ ვგეგმავთ, Meta-ში დიზაინის როლი გავაძლიეროთ და შევკრიბოთ ნიჭიერი ჯგუფი, რომელსაც ექნება ოსტატობის, კრეატიული ხედვის, სისტემური აზროვნებისა და აპარატურისა და პროგრამული უზრუნველყოფის გამაერთიანებელი საკულტო პროდუქტების შექმნის ღრმა გამოცდილება“, - დასძინა ცუკერბერგმა.