Meta-ს AI სათვალეები ახალ ფუნქციას იძენს: უკეთესი სმენა ხმაურიან გარემოში

კომპანია Meta-მ თავისი ხელოვნური ინტელექტის მქონე სათვალეებისთვის მნიშვნელოვანი განახლება დააანონსა, რომელიც მომხმარებლებს ხმაურიან გარემოში საუბრის უკეთ აღქმაში დაეხმარება. კომპანიის განცხადებით, ეს ფუნქცია თავდაპირველად ხელმისაწვდომი იქნება Ray-Ban Meta და Oakley Meta HSTN-ის მოდელებისთვის აშშ-სა და კანადაში.

ამასთან ერთად, სათვალეები კიდევ ერთ სიახლეს იძენს, რომელიც Spotify-სთან ინტეგრაციას გულისხმობს. მომხმარებლებს შეეძლებათ მოუსმინონ მუსიკას, რომელიც მათ ამჟამინდელ ხედვის არეალში არსებულ ობიექტს შეესაბამება. მაგალითად, თუ ალბომის გარეკანს უყურებთ, სათვალე შემოგთავაზებთ ამ შემსრულებლის სიმღერას, ხოლო თუ საჩუქრებით მორთულ ნაძვის ხეს, შესაძლოა, საახალწლო მელოდია ჩაირთოს.

მიუხედავად იმისა, რომ Spotify-ს ფუნქცია უფრო გასართობ ხასიათს ატარებს, ის კარგად აჩვენებს Meta-ს სტრატეგიას, დააკავშიროს ის, რასაც ადამიანები ხედავენ, მათ აპლიკაციებში არსებულ მოქმედებებთან. ამის ფონზე, საუბრის გაუმჯობესების ფუნქცია გაცილებით პრაქტიკული ჩანს.

ეს ტექნოლოგია, რომელიც პირველად Meta-ს Connect კონფერენციაზე წარადგინეს, სათვალის ღია ტიპის დინამიკებს იყენებს იმ ადამიანის ხმის გასაძლიერებლად, ვისაც ესაუბრებით. Meta-ს ცნობით, მომხმარებლებს შეეძლებათ ხმის გაძლიერების დონის რეგულირება სათვალის მარჯვენა ყურის საყრდენზე თითის გასმით ან მოწყობილობის პარამეტრებიდან.

ეს შესაძლებლობა მომხმარებლებს საშუალებას მისცემს, ხმის დონე ზუსტად მოარგონ კონკრეტულ გარემოს, იქნება ეს ხალხმრავალი რესტორანი, ბარი, კლუბი თუ საზოგადოებრივი ტრანსპორტი. რა თქმა უნდა, ფუნქციის ეფექტიანობა რეალურ პირობებში ტესტირებას საჭიროებს.

აღსანიშნავია, რომ სმენის გაუმჯობესებისთვის ჭკვიანი აქსესუარების გამოყენების იდეა მხოლოდ Meta-ს არ ეკუთვნის. Apple-ის AirPods-ს უკვე აქვს „საუბრის გაძლიერების“ (Conversation Boost) ფუნქცია, რომელიც თანამოსაუბრეზე ფოკუსირებას უწყობს ხელს, ხოლო Pro მოდელებმა ცოტა ხნის წინ კლინიკური დონის სასმენი აპარატის მხარდაჭერაც მიიღეს.

სანამ საუბრის გაუმჯობესების ფუნქცია მხოლოდ აშშ-სა და კანადაში იქნება ხელმისაწვდომი, Spotify-ს ინტეგრაცია ინგლისურ ენაზე გაცილებით მეტ ბაზარზე გავრცელდება. მათ შორისაა ავსტრალია, ავსტრია, ბელგია, ბრაზილია, კანადა, დანია, ფინეთი, საფრანგეთი, გერმანია, ინდოეთი, ირლანდია, იტალია, მექსიკა, ნორვეგია, ესპანეთი, შვედეთი, არაბთა გაერთიანებული საამიროები, დიდი ბრიტანეთი და აშშ.

პროგრამული უზრუნველყოფის განახლება (v21) პირველ რიგში ხელმისაწვდომი გახდება Meta-ს „ადრეული წვდომის პროგრამის“ (Early Access Program) მონაწილეებისთვის, რაც მომლოდინეთა სიაში ჩაწერასა და დამტკიცებას მოითხოვს. მოგვიანებით კი ის უფრო ფართო აუდიტორიისთვისაც გავრცელდება.