Microsoft-ის $15.2-მილიარდიანი ინვესტიცია: საამიროები აშშ-ის ხელოვნური ინტელექტის დიპლომატიის საცდელ პოლიგონად იქცევა

ტექნოლოგიურმა გიგანტმა Microsoft-მა აბუ-დაბის ხელოვნური ინტელექტის პირველ ყოველწლიურ სამიტზე განაცხადა, რომ მომდევნო ოთხი წლის განმავლობაში არაბთა გაერთიანებულ საამიროებში 15.2 მილიარდი დოლარის ინვესტიციას განახორციელებს. ეს შეთანხმება რეგიონისთვის ისტორიულ მოვლენას, Nvidia-ს ყველაზე მოწინავე გრაფიკული პროცესორების (GPU) პირველ მიწოდებას ითვალისწინებს.

შეთანხმების ფარგლებში, აშშ-ის მთავრობამ Microsoft-ს საამიროებში Nvidia-ს ჩიპების ექსპორტის ლიცენზია მიანიჭა. ეს ნაბიჯი ქვეყანას ერთდროულად აქცევს აშშ-ის საექსპორტო კონტროლის დიპლომატიის საცდელ პლატფორმად და რეგიონში ამერიკული ხელოვნური ინტელექტის გავლენის მთავარ დასაყრდენად. გარიგება Microsoft-ს საშუალებას აძლევს, გააფართოოს თავისი პოზიციები ახლო აღმოსავლეთში, რომელიც ხელოვნური ინტელექტის სფეროში გლობალური დომინირებისთვის ბრძოლის საკვანძო რეგიონია.

აღსანიშნავია, რომ ჯერ კიდევ მაისში, პრეზიდენტმა დონალდ ტრამპმა საამიროების პრეზიდენტთან, შეიხ მუჰამად ბინ ზაიიდ ალ ნაჰაიანთან, აბუ-დაბიში ხელოვნური ინტელექტის მონაცემთა ცენტრის კამპუსის მშენებლობაზე შეთანხმებას მიაღწია. თუმცა, პროექტი აშშ-ის საექსპორტო კონტროლის გამო შეფერხდა, რომელიც მოწინავე სისტემებისთვის აუცილებელი Nvidia-ს მძლავრი ჩიპების გაყიდვას ზღუდავდა. Microsoft-ი გახდა პირველი კომპანია, რომელმაც სექტემბერში აშშ-ის ვაჭრობის დეპარტამენტისგან ამ ჩიპების საამიროებში გაგზავნის ლიცენზია მიიღო.

კრიტიკოსების აზრით, ეს გადაწყვეტილება ძირს უთხრის აშშ-ის მიერ ჩინეთის მიმართ დაწესებული საექსპორტო შეზღუდვების ლოგიკას, რადგან ჩინეთის მოკავშირის მეშვეობით შესაძლო შემოვლითი გზების გაჩენის რისკს ქმნის. საპასუხოდ, Microsoft-ი აცხადებს, რომ ლიცენზიის მისაღებად კიბერუსაფრთხოებისა და ეროვნული უსაფრთხოების მკაცრი მოთხოვნების დასაკმაყოფილებლად „არსებითი სამუშაო“ გასწია.

ამ ძალისხმევის შედეგად, კომპანიამ საამიროებში A100, H100 და H200 მოდელების კომბინაციით 21,500 Nvidia A100 GPU-ს ეკვივალენტური გამოთვლითი სიმძლავრე დააგროვა. Microsoft-ის განმარტებით, ეს რესურსი გამოიყენება OpenAI-ს, Anthropic-ის, ღია კოდის მქონე პროვაიდერებისა და თავად კომპანიის ხელოვნური ინტელექტის მოდელებზე წვდომის უზრუნველსაყოფად.

საერთო ჯამში, 15.2 მილიარდი დოლარის ინვესტიცია მოიცავს იმ თანხებსაც, რომელთა ხარჯვაც Microsoft-მა ქვეყანაში 2023 წლიდან, ახალი AI ინიციატივის ფარგლებში დაიწყო. 2023 წლიდან 2025 წლის ბოლომდე კომპანია 7.3 მილიარდ დოლარზე მეტს დახარჯავს, მათ შორის 1.5 მილიარდს G42-ში (საამიროების სუვერენული AI კომპანია) სააქციო კაპიტალის სახით და 4.6 მილიარდ დოლარზე მეტს მონაცემთა ცენტრების მშენებლობისთვის.

ახალი შეთანხმების თანახმად, Microsoft-ი იღებს ვალდებულებას, 2026 წლის დასაწყისიდან 2029 წლის ბოლომდე დამატებით 7.9 მილიარდი დოლარი დახარჯოს. აქედან 5.5 მილიარდი დოლარი მიმართული იქნება ხელოვნური ინტელექტისა და ღრუბლოვანი ინფრასტრუქტურის მიმდინარე და დაგეგმილი გაფართოებისკენ. კომპანიამ ასევე მიანიშნა, რომ ამ კვირაში აბუ-დაბიში დამატებით სიახლეებს გაასაჯაროებს.

Microsoft-ის საქმიანობა საამიროებში მხოლოდ მონაცემთა ცენტრების მშენებლობით არ შემოიფარგლება. კომპანია გეგმავს მასიური ინფრასტრუქტურის შექმნასთან ერთად, დიდი ინვესტიცია განახორციელოს ადგილობრივი ნიჭის განვითარებაში, ტრენინგებსა და მმართველობაში. კომპანია პირობას დებს, რომ 2027 წლისთვის ერთ მილიონ ადგილობრივ მაცხოვრებელს გადაამზადებს და აბუ-დაბის ხელოვნური ინტელექტის კვლევისა და მოდელების განვითარების რეგიონულ ჰაბად აქცევს.

აღსანიშნავია, რომ ეს ინვესტიცია იმავე დღეს გამოცხადდა, როდესაც Microsoft-მა ავსტრალიურ კომპანია IREN-თან ხელოვნური ინტელექტის ღრუბლოვანი სიმძლავრეების შესახებ 9.7 მილიარდი დოლარის ღირებულების ხელშეკრულება გააფორმა.