Microsoft-ის გეიმინგის ახალი ხელმძღვანელი პირობას დებს, რომ ეკოსისტემას „უსულო AI ნაგვით“ არ აავსებს

პარასკევს Microsoft-მა გეიმინგის მიმართულებით მნიშვნელოვანი სტრუქტურული ცვლილებები დააანონსა. Microsoft Gaming-ის აღმასრულებელი დირექტორი ფილ სპენსერი და Xbox-ის პრეზიდენტი სარა ბონდი კომპანიას ტოვებენ. მათ ადგილს აშა შარმა დაიკავებს, რომელიც მანამდე Instacart-სა და Meta-ში ხელმძღვანელ პოზიციებზე მუშაობდა.

შარმას ბოლო პოზიცია Microsoft-ის CoreAI პროდუქტის პრეზიდენტობა იყო, რაც იძლევა საფუძველს ვივარაუდოთ, რომ კომპანია ვიდეო თამაშებში ხელოვნური ინტელექტის ინტეგრირებას კიდევ უფრო გააძლიერებს. Microsoft-ს უკვე ჰქონდა გარკვეული ექსპერიმენტები ამ სფეროში, მაგალითად, AI გეიმინგ-კომპანიონის შექმნა და „Quake II“-ისთვის ხელოვნური ინტელექტის მიერ გენერირებული, ხარვეზებით სავსე დონის გამოშვება.

გამოცემა The Verge-ის მიერ გამოქვეყნებულ შიდა მემორანდუმში შარმა წერს, რომ Microsoft „ახალ ბიზნეს მოდელებსა და თამაშის ახალ გზებს გამოიგონებს“. მისი თქმით, „მონეტიზაცია და ხელოვნური ინტელექტი“ მომავალში განვითარდება და ამ სფეროზე დიდ გავლენას მოახდენს.

ამავდროულად, მან ხაზგასმით აღნიშნა, რომ კომპანია არ აპირებს მოკლევადიან ეფექტურობას გამოეკიდოს. „ჩვენ არ ავავსებთ ჩვენს ეკოსისტემას უსულო AI ნაგვით (AI slop)“, — განაცხადა შარმამ.

„თამაშები არის და ყოველთვის იქნება ხელოვნება, რომელიც ადამიანების მიერ იქმნება ჩვენ მიერ მიწოდებული ყველაზე ინოვაციური ტექნოლოგიების გამოყენებით“, — დასძინა მან.

ეს განცხადება ერთ-ერთია იმ სამი ძირითადი პირობიდან, რომელიც შარმამ თავის მემორანდუმში ჩამოაყალიბა:

• პირველი დაპირება: თამაშების, როგორც ადამიანის მიერ შექმნილი ხელოვნების აღიარება და ეკოსისტემის დაცვა დაბალი ხარისხის AI კონტენტისგან.
• მეორე დაპირება: „მოთამაშეებისთვის საყვარელი შესანიშნავი თამაშების“ შექმნა.
• მესამე დაპირება: Xbox-ის პლატფორმისთვის პრიორიტეტის მინიჭება.