მომხმარებელთა კრიტიკის მიუხედავად, Meta ევროპაში AI ვიდეოების პლატფორმას, Vibes-ს, ნერგავს

კომპანია Meta-მ ხუთშაბათს განაცხადა, რომ ევროპაში ხელოვნური ინტელექტის მიერ გენერირებული მოკლე ვიდეოების პლატფორმას, Vibes-ს, უშვებს. ეს ფუნქცია ხელმისაწვდომი იქნება Meta AI აპლიკაციაში და წარმოადგენს TikTok-ის ან Instagram Reels-ის ანალოგს, თუმცა ერთი მთავარი განსხვავებით — აქ ყველა ვიდეო ხელოვნური ინტელექტის შექმნილია. ევროპული პრემიერა აშშ-ში პლატფორმის წარდგენიდან ექვსი კვირის შემდეგ შედგა.

Meta-ს ამერიკული დებიუტიდან რამდენიმე დღეში, კომპანია OpenAI-მ საკუთარი პლატფორმა, Sora, გამოუშვა, რომელიც ასევე ხელოვნური ინტელექტის მიერ გენერირებული ვიდეოების შექმნასა და გაზიარებაზეა ორიენტირებული. Vibes-ის მეშვეობით მომხმარებლებს შეუძლიათ შექმნან და გააზიარონ AI ვიდეოები და ნახონ სხვა მომხმარებლების მიერ შექმნილი კონტენტი. Meta-ს განცხადებით, დროთა განმავლობაში ვიდეოების ნაკადი მომხმარებლის ინტერესებზე უფრო მეტად მორგებული გახდება.

კონტენტის შექმნისას, მომხმარებელს შეუძლია ვიდეოს გენერირება ტექსტური მოთხოვნის (prompt) საფუძველზე ან სხვისი ვიდეოს „რემიქსის“ გაკეთება. შესაძლებელია ახალი ვიზუალური ელემენტების დამატება, მუსიკის დადება ან სტილის შეცვლა ინდივიდუალური გემოვნების შესაბამისად. „ეს არის სოციალური და კოლაბორაციული შემოქმედებითი გამოცდილება, რომელიც მოგიწოდებთ, შექმნათ რემიქსები, იმუშაოთ სხვებთან ერთად და მეგობრებთან ერთად მოყვნეთ ისტორიები“, — წერს Meta თავის ბლოგპოსტში.

შექმნილი ვიდეოებისა და კონტენტის გაზიარება შესაძლებელია პირდაპირ Vibes-ის პლატფორმაზე, მეგობრებისთვის გაგზავნა ან Instagram-ისა და Facebook-ის „სთორებსა“ და „რილსებში“ განთავსება. მიუხედავად კომპანიის ენთუზიაზმისა, როდესაც Meta-ს აღმასრულებელმა დირექტორმა, მარკ ცუკერბერგმა, სექტემბერში პლატფორმა პირველად წარადგინა, მომხმარებლების რეაქცია მოსალოდნელად უარყოფითი იყო, რადგან ბევრს არ სურს TikTok-ის ხელოვნური ინტელექტის მიერ შექმნილი ვერსია.

ცუკერბერგის პოსტზე ერთ-ერთი ყველაზე პოპულარული კომენტარი იყო: „ეს არავის უნდა“, ხოლო მეორე მომხმარებელი წერდა: „ტიპი საკუთარ აპლიკაციაში AI-ის ნაგავს პოსტავს“. კიდევ ერთი კომენტარი კი ასეთი იყო: „მგონი, ყველას სახელით ვიტყვი, როცა ვიკითხავ: რა...?“.

მაშინ, როცა Meta აქტიურად ნერგავს ხელოვნური ინტელექტის მიერ გენერირებულ კონტენტს, სხვა კომპანიები, მაგალითად YouTube, ცდილობენ ამ პრობლემას შეებრძოლონ. სოციალური პლატფორმები სულ უფრო ივსება „AI slop“-ით — ტერმინით, რომელიც დაბალი ხარისხის, მასობრივად წარმოებულ AI კონტენტს აღნიშნავს.

Meta-ს მიერ Vibes-ის გაშვება განსაკუთრებით დამაბნეველია იმ ფონზე, რომ კომპანიამ წლის დასაწყისში განაცხადა, რომ „არაორიგინალურ“ კონტენტს ებრძოდა და კონტენტის შემქმნელებს ურჩევდა, ფოკუსირება „ავთენტურ თხრობაზე“ გაეკეთებინათ და არა მცირე ღირებულების მქონე მოკლე ვიდეოებზე. მიუხედავად ამისა, Meta ამაყობს Vibes-ის გაშვებით და აცხადებს, რომ Meta AI აპლიკაციაში მედიის გენერირების მაჩვენებელი მისი ამოქმედების შემდეგ ათჯერ გაიზარდა.