მუსიკალური ინდუსტრიის ახალი ერა: Warner Music-მა AI სტარტაპ Suno-სთან ისტორიული გარიგება გააფორმა

Warner Music Group-მა (WMG) სამშაბათს განაცხადა, რომ ხელოვნური ინტელექტის მუსიკალურ სტარტაპ Suno-სთან შეთანხმებას მიაღწია და მასთან საავტორო უფლებების შესახებ სასამართლო დავა მოაგვარა. კომპანიის პრესრელიზის თანახმად, ეს გარიგება „მუსიკის შექმნაში, მასთან ინტერაქციასა და აღმოჩენაში ახალ ჰორიზონტებს გახსნის, ამასთან, უზრუნველყოფს არტისტების, კომპოზიტორებისა და ფართო შემოქმედებითი საზოგადოების დაცვასა და კომპენსაციას“.

შეთანხმების ფარგლებში, WMG-მ Suno-ს მიჰყიდა ცოცხალი მუსიკისა და კონცერტების აღმოჩენის პლატფორმა Songkick-ი, გარიგების ღირებულება არ სახელდება. Warner Music-მა Songkick-ის აპლიკაცია და ბრენდი 2017 წელს შეიძინა, მოგვიანებით კი Live Nation-მა მისი ბილეთების გაყიდვის ბიზნესი იყიდა. WMG-ის განცხადებით, Songkick-ი Suno-ს მფლობელობაშიც გააგრძელებს ფუნქციონირებას, როგორც ფანებისთვის განკუთვნილი პლატფორმა.

WMG-სთან პარტნიორობის შედეგად, Suno მომავალ წელს უფრო მოწინავე და ლიცენზირებულ მოდელებს გამოუშვებს, რომლებიც ამჟამინდელ ვერსიებს ჩაანაცვლებს. სერვისიდან აუდიოს გადმოწერა ფასიანი ანგარიშის მფლობელებს შეეძლებათ, ხოლო უფასო ვერსიის მომხმარებლები მხოლოდ პლატფორმაზე შექმნილი სიმღერების მოსმენითა და გაზიარებით შემოიფარგლებიან.

მნიშვნელოვანია, რომ WMG-ის არტისტები და კომპოზიტორები სრულ კონტროლს შეინარჩუნებენ იმაზე, თუ როგორ და რა ფორმით იქნება გამოყენებული მათი სახელები, გამოსახულებები, ხმები და კომპოზიციები ხელოვნური ინტელექტის მიერ გენერირებულ ახალ მუსიკაში. WMG-სთან კონტრაქტი აქვთ ისეთ არტისტებს, როგორებიც არიან ლედი გაგა, Coldplay, The Weeknd, საბრინა კარპენტერი და სხვები.

„Suno-სთან დადებული ეს ისტორიული პაქტი არის გამარჯვება შემოქმედებითი საზოგადოებისთვის, რომელიც ყველასთვის სასარგებლოა“, - განაცხადა WMG-ის აღმასრულებელმა დირექტორმა რობერტ კინკლმა. „იმ ფონზე, როცა Suno სწრაფად იზრდება როგორც მომხმარებლების რაოდენობით, ისე მონეტიზაციის კუთხით, ჩვენ გამოვიყენეთ ეს შესაძლებლობა, რათა ჩამოვაყალიბოთ მოდელები, რომლებიც გაზრდის შემოსავლებს და ფანებს ახალ გამოცდილებას შესთავაზებს“.

ეს სიახლე მოჰყვა ერთი კვირით ადრე WMG-ის მიერ ხელოვნური ინტელექტის სხვა მუსიკალურ სტარტაპთან, Udio-სთან, საავტორო უფლებების დავის მოგვარებას და სალიცენზიო ხელშეკრულების გაფორმებას. ეს შეთანხმებები მუსიკალურ ინდუსტრიაში ხელოვნური ინტელექტის მიმართ მიდგომის მნიშვნელოვან ცვლილებაზე მიუთითებს.

გასულ წელს Warner Music Group-მა, Universal Music Group-მა და Sony Music Entertainment-მა Suno-სა და Udio-ს საავტორო უფლებების დარღვევისთვის უჩივლეს. მიუხედავად იმისა, რომ WMG-მ ორივე სტარტაპთან დავა მოაგვარა, გავრცელებული ინფორმაციით, Universal Music Group-ი და Sony Music Entertainment-იც აწარმოებენ მოლაპარაკებებს Udio-სა და Suno-სთან თავიანთი ნამუშევრების ლიცენზირებისა და სასამართლო დავების მოგვარების მიზნით.

ხელოვნური ინტელექტის მუსიკალური ტექნოლოგიების მიმართ ინვესტორების მაღალი ნდობის ნიშნად, Suno-მ გასულ კვირას განაცხადა, რომ Series C რაუნდში 250 მილიონი დოლარი მოიზიდა, რის შედეგადაც კომპანიის შეფასებამ 2.45 მილიარდი დოლარი შეადგინა. რაუნდს Menlo Ventures-ი ხელმძღვანელობდა, მასში ასევე მონაწილეობდნენ Nvidia-ს სარისკო კაპიტალის ფრთა NVentures, Hallwood Media, Lightspeed და Matrix.