New York Times-ი და სხვა მედიასაშუალებები ბრაუზერ Brave-ს კონტენტის უკანონო მოპოვებისთვის უჩივიან

ორშაბათს New York Times-მა სასამართლოში უჩივლა 11 წლის წინ დაარსებულ, კონფიდენციალურობაზე ორიენტირებულ ბრაუზერ Brave-ს. სარჩელის თანახმად, კომპანია გამოცემის საავტორო უფლებებით დაცულ კონტენტს უკანონოდ მოიპოვებდა (ე.წ. scraping) და მას ისეთ კლიენტებს აწვდიდა, როგორიცაა Anthropic, Perplexity, Mistral, xAI და Cohere.
პარალელურად, ორშაბათსვე მსგავსი სარჩელები შეიტანეს გამოცემებმა: Daily News, Chicago Tribune და Orlando Sentinel. ყველა ეს სარჩელი მანჰეტენის ფედერალურ სასამართლოშია წარდგენილი. New York Times-ი, რომელსაც მანამდე მსგავსი პრეტენზიებით OpenAI-სა და Perplexity-ს წინააღმდეგაც ჰქონდა დაწყებული დავა, Brave-ს ხელოვნური ინტელექტის კომპანიებისთვის „მოპარული საავტორო კონტენტის მიმწოდებელსა და დისტრიბუტორს“ უწოდებს.
„ამგვარად, Brave ერთდროულად მოქმედებს როგორც მძარცველი, რომელიც გამომცემლების კონტენტს უკანონოდ ითვისებს, და როგორც ხელოვნური ინტელექტის 'გადამყიდველი', რომელიც მოპარულ მასალას მესამე მხარეებზე ყიდის“, — ნათქვამია სარჩელში. დოკუმენტის მიხედვით, Brave-მა 30 მილიარდზე მეტი ვებგვერდისგან შემდგარი ინდექსი შექმნა დაუდგენელი ე.წ. „ქროულერის“ (crawler) გამოყენებით, რის გამოც გამომცემლებს მისი დაბლოკვის შესაძლებლობა არ ჰქონდათ.
სასამართლო დავა ასევე ეხება Brave-ის იმ ფუნქციას, რომელიც ფასიან ვებგვერდებზე წვდომის შეზღუდვებს (paywalls) გვერდს უვლის. გარდა ამისა, სარჩელში საუბარია კომპანიის პრაქტიკაზე, რომელიც გამომცემლების რეკლამებს ბლოკავს და მათ ნაცვლად საკუთარს ყიდის. 2015 წელს დაარსებულმა Brave-მა, კერძო ბაზრის მონაცემებით, დღემდე დაახლოებით 250 მილიონი დოლარის ინვესტიცია მოიზიდა. New York Times-ი სასამართლოსგან საქმიანობის აკრძალვასა და ზიანის ანაზღაურებას მოითხოვს. Brave-ს აღნიშნულ საკითხზე კომენტარი ჯერჯერობით არ გაუკეთებია.