Nvidia-სთან $20-მილიარდიანი შეთანხმების შემდეგ, AI ჩიპების სტარტაპი Groq $650 მილიონის მოზიდვას აპირებს

ხელოვნური ინტელექტის ჩიპების მწარმოებელი სტარტაპი Groq არსებული ინვესტორებისგან 650 მილიონი აშშ დოლარის ოდენობის ახალი დაფინანსების მოზიდვას გეგმავს. Axios-ის ინფორმაციით, კომპანია ამჟამად აქცენტს საკუთარ „ინფერენს ნეოქლაუდ“ (inference neocloud) ბიზნესზე აკეთებს, რომელიც Groq-ის მიერ შექმნილ AI ჩიპებსა და სისტემებს ეფუძნება.
გასული წლის დეკემბერში Groq-მა Nvidia-სთან უჩვეულო შეთანხმება გააფორმა, რომელიც, გავრცელებული ინფორმაციით, 20 მილიარდ აშშ დოლარად შეფასდა. ეს გარიგება არ იყო სრულფასოვანი შესყიდვა, თუმცა ის ითვალისწინებდა Groq-ის რამდენიმე მაღალი რანგის ხელმძღვანელის გადასვლას Nvidia-ში და სტარტაპის აპარატურული ტექნოლოგიების ლიცენზირებას ჩიპების გიგანტისთვის.
აღნიშნული შეთანხმება მომგებიანი აღმოჩნდა სტარტაპის ინვესტორებისთვის, რომლებმაც ნაღდი ფულის სახით მიიღეს ანაზღაურება. ეს თანხა იმ მოცულობის იყო, რასაც Nvidia სრულფასოვანი შესყიდვის შემთხვევაში გადაიხდიდა. ახლა კი ინვესტორებს სთხოვენ, მხარი დაუჭირონ კომპანიის გეგმებს „ინფერენს ქლაუდ“ ბიზნესის გაფართოების შესახებ, რაც დეველოპერებსა და საწარმოებს საშუალებას მისცემს, განათავსონ თავიანთი რესურსტევადი აპლიკაციები.
„ინფერენსი“ (Inference) წარმოადგენს მონაცემთა დამუშავების პროცესს, რომელიც AI მოთხოვნის (prompt) გაგზავნის შემდეგ ხდება. ამჟამად ხელოვნური ინტელექტის სფეროში ამ პროცესზე უფრო დიდი მოთხოვნაა, ვიდრე უშუალოდ მოდელების წვრთნაზე. კომპანიის ახალ მიმართულებას ამჟამად Groq-ის აღმასრულებელი დირექტორის მოვალეობის შემსრულებელი ადამ ვინტერი და ფინანსური დირექტორი მეტ ენგი ხელმძღვანელობენ.
გარკვეულწილად, 650 მილიონი დოლარის ოდენობის დაფინანსება გარანტირებულია. Axios-ის ცნობით, Groq-ის მხარდამჭერები, Disruptive და Infinitium, დათანხმდნენ რაუნდის სრულად შევსებას იმ შემთხვევაში, თუ სხვა არსებული ინვესტორები თავიანთი წილების შესაბამისი ინვესტიციის განხორციელებაზე უარს იტყვიან.