OpenAI-მ ინდოეთში ChatGPT-ის იაფფასიანი სააბონენტო გეგმა წარადგინა

OpenAI-მ დღეს ინდოეთში ChatGPT-ის ახალი, შედარებით იაფი სააბონენტო გეგმა - ChatGPT GO წარადგინა, რომლის ღირებულებაც თვეში 399 რუპია (დაახლოებით 4.60 დოლარი) იქნება. ეს მნიშვნელოვნად ნაკლებია Plus გეგმის ფასზე, რომელიც 1,999 რუპია (დაახლოებით 23 დოლარი) ღირს.

კომპანიამ რამდენიმე დღის წინ ყველა თავისი გეგმისთვის ადგილობრივ ვალუტაში გადახდის შესაძლებლობა დაამატა. ახალი გეგმით მომხმარებლებს შეუძლიათ გადახდა განახორციელონ UPI-ის (Unified Payment Interface) საშუალებით, რაც ინდოეთის გადახდების სისტემაა.

OpenAI-ის ვიცე-პრეზიდენტისა და ChatGPT-ის ხელმძღვანელის, ნიკ ტურლის განცხადებით, ახალი გეგმა უფასო ვერსიასთან შედარებით 10-ჯერ მეტ შეტყობინებას, სურათის გენერაციასა და ფაილების ატვირთვას უზრუნველყოფს. ასევე, ChatGPT Go გეგმა გააუმჯობესებს მეხსიერების შენახვის შესაძლებლობას პერსონალიზებული პასუხებისთვის.

"მომხმარებლების მთავარი მოთხოვნა ChatGPT-ის ხელმისაწვდომობის გაზრდა იყო! ჩვენ Go-ს პირველად ინდოეთში ვნერგავთ და უკუკავშირის საფუძველზე სხვა ქვეყნებშიც გავავრცელებთ", - განაცხადა ტურლიმ.

გასულ თვეში ტურლიმ აღნიშნა, რომ ChatGPT-ს მსოფლიო მასშტაბით ყოველკვირეულად 700 მილიონზე მეტი მომხმარებელი ჰყავს, რაც მარტის თვის 500 მილიონიან მაჩვენებელთან შედარებით მნიშვნელოვანი ზრდაა.

OpenAI-ის გენერალური დირექტორის, სემ ალტმანის თქმით, ინდოეთი კომპანიის მეორე უმსხვილესი ბაზარია. აპლიკაციების ანალიტიკური კომპანიის AppFigures-ის მონაცემებით, ბოლო 90 დღის განმავლობაში ინდოეთიდან ChatGPT-ის აპლიკაცია 29 მილიონზე მეტჯერ ჩამოიტვირთა, თუმცა ამ პერიოდში ქვეყანაში მხოლოდ 3.6 მილიონი დოლარის შემოსავალი დაფიქსირდა.