OpenAI მომხმარებლების კრიტიკის შემდეგ ChatGPT-ში სარეკლამო ტიპის შეთავაზებებს აჩერებს

კომპანია OpenAI-მ განაცხადა, რომ გამორთო აპლიკაციების შეთავაზების ფუნქცია, რომელიც მომხმარებლებმა რეკლამად აღიქვეს. ეს გადაწყვეტილება მას შემდეგ მიიღეს, რაც ChatGPT-ის ფასიანი ვერსიის გამომწერებმა სოციალურ ქსელებში ჩივილი დაიწყეს ისეთი კომპანიების, როგორიცაა Peloton და Target, სარეკლამო შეტყობინებების გამოჩენის გამო.

მიუხედავად იმისა, რომ OpenAI კატეგორიულად უარყოფს ChatGPT-ში რეკლამის არსებობას ან ტესტირებას, კომპანიის კვლევების მთავარმა ოფიცერმა, მარკ ჩენმა, აღიარა, რომ კომპანიამ „ვერ გაამართლა მოლოდინი“ და მომხმარებლის გამოცდილების გაუმჯობესებაზე მუშაობს. კომპანიის წარმომადგენლების თქმით, ისინი მხოლოდ ChatGPT-ის პლატფორმაზე შექმნილი აპლიკაციების ჩვენების გზებს ცდიდნენ და ამ შეთავაზებებს „არანაირი ფინანსური კომპონენტი“ არ ჰქონია.

მომხმარებლების რეაქცია სკეპტიკური იყო. ერთ-ერთმა მათგანმა, ვინც თავდაპირველად გააპროტესტა ეს სიახლე, დაწერა: „კარგი რა... ნუ შეურაცხყოფთ თქვენს გადამხდელ მომხმარებლებს“. სხვა მომხმარებელმა კი გამოაქვეყნა სკრინშოტი, სადაც Windows BitLocker-ის შესახებ დასმული კითხვის საპასუხოდ, ChatGPT მას Target-ში საყიდლებზე წასვლას სთავაზობდა, რამაც მისი აღშფოთება გამოიწვია.

ChatGPT-ის ხელმძღვანელმა, ნიკ ტარლიმ, პარასკევს გამოაქვეყნა პოსტი, სადაც აღნიშნა, რომ „ChatGPT-ში რეკლამის შესახებ ბევრი გაუგებრობაა“. მისი თქმით, „რეკლამის ტესტირება არ მიმდინარეობს – ნებისმიერი სკრინშოტი, რომელიც ნახეთ, ან ყალბია, ან არ არის რეკლამა“. მან დაამატა, რომ თუ კომპანია რეკლამის დანერგვას გადაწყვეტს, ამას „გააზრებულად“ გააკეთებს, რათა მომხმარებლების ნდობა შეინარჩუნოს.

თუმცა, იმავე დღეს, მარკ ჩენმა უფრო მომნანიებელი ტონით ისაუბრა და აღიარა, რომ პრობლემა მხოლოდ მომხმარებლების გაუგებრობაში არ მდგომარეობს. „ვეთანხმები, რომ ყველაფერი, რაც რეკლამას ჰგავს, სიფრთხილეს მოითხოვს და ჩვენ ამ შემთხვევაში შეცდომა დავუშვით“, - დაწერა მან. ჩენის თქმით, კომპანიამ „გამორთო ამ ტიპის შეთავაზებები“, სანამ მოდელის სიზუსტეს არ გააუმჯობესებს და მომხმარებლებს არ მისცემს ამ ფუნქციის კონტროლის ან სრულად გათიშვის საშუალებას.

აღსანიშნავია, რომ წლის დასაწყისში OpenAI-ს Instacart-ისა და Facebook-ის ყოფილი აღმასრულებელი, ფიჯი სუმო, შეუერთდა, რის შემდეგაც ბევრი მოელოდა, რომ კომპანია სარეკლამო ბიზნესის განვითარებას დაიწყებდა. თუმცა, როგორც Wall Street Journal-ი იტყობინება, OpenAI-ის აღმასრულებელმა დირექტორმა, სემ ალტმანმა, ცოტა ხნის წინ კომპანიაში „წითელი კოდი“ გამოაცხადა, რითაც პრიორიტეტი ChatGPT-ის ხარისხის გაუმჯობესებას მიანიჭა და სხვა პროექტები, მათ შორის რეკლამის დანერგვა, დროებით უკანა პლანზე გადასწია.