Phia-ს „ქუქიების ჩანაცვლებაში“ ადანაშაულებენ: ბილ გეითსის ქალიშვილის სტარტაპი სკანდალში გაეხვია

ბილ გეითსის ქალიშვილის, ფიბი გეითსისა და სოფია კიანის მიერ დაფუძნებულ შოპინგ-სტარტაპ Phia-ს „ქუქიების ჩანაცვლებაში“ (cookie stuffing) ადანაშაულებენ. Bloomberg-ის მიერ ჩატარებული მოკვლევის თანახმად, აღნიშნული პრაქტიკა კომპანიას შესაძლოა დახმარებოდა იმ გაყიდვებიდან საკომისიოებისა და კრედიტების მიღებაში, რომლებიც რეალურად მისი მეშვეობით არ განხორციელებულა.ამ ანგარიშმა დიდი ვნებათაღელვა გამოიწვია, რასაც შედეგად Phia-ს წამყვანი აფილირებული და ინფლუენსერ-პლატფორმიდან, Impact.com-დან გარიცხვა მოჰყვა. „ქუქიების ჩანაცვლების“ გამო სასამართლო დავა სხვა სტარტაპების წინააღმდეგაც დაწყებულა — მათ შორის ყველაზე ცნობილია Honey, რომელიც PayPal-ის მფლობელობაშია და ამჟამად კოლექტიური სარჩელის ობიექტია.2025 წელს დაფუძნებულმა Phia-მ 40 მილიონ დოლარზე მეტი დაფინანსება მოიზიდა. მის ინვესტორთა შორის არაერთი ვარსკვლავია, მათ შორის ქლოი კარდაშიანი და ჰეილი ბიბერი. სტარტაპმა შექმნა ბრაუზერის გაფართოება, რომელიც გარკვეულწილად Google Flights-ის პრინციპით მუშაობს, თუმცა შოპინგისთვისაა განკუთვნილი. Phia მომხმარებლებს სხვადასხვა რითეილერებთან ყველაზე დაბალი ფასებისა და ფასდაკლების კოდების მოძიებაში ეხმარება.კომპანია საკომისიოს იღებს პლატფორმის მეშვეობით განხორციელებული შესყიდვებიდან, რაც ინდუსტრიაში აფილირებული მარკეტინგის სახელითაა ცნობილი. თუმცა, Bloomberg-ის გამოძიებამ, ისევე როგორც დამოუკიდებელი კონსულტანტისა და კონკურენტის მიერ მოპოვებულმა მონაცემებმა, აჩვენა, რომ როდესაც მომხმარებელი ონლაინ მაღაზიაში შედიოდა — მაშინაც კი, თუ ის საიტზე დამოუკიდებლად ან სხვა აფილირებული პროგრამის (მაგალითად, Wirecutter-ის) მეშვეობით ხვდებოდა — Phia ფონურ რეჟიმში ახალ ფანჯარას ხსნიდა.ანგარიშსწორების პროცესში Phia ანაცვლებდა სხვა აფილირებული პირების რეფერალურ კოდებს საკუთარი კოდებით. ეს კომპანიას საშუალებას აძლევდა, მიეთვისებინა ტრანზაქციის ავტორობა და პოტენციურად მიეღო საკომისიო იმ შესყიდვებზე, რომლებშიც რეალური წვლილი არ მიუძღოდა. მას შემდეგ, რაც საკითხი Phia-ს წინაშე დაისვა, კომპანიის წარმომადგენელმა Bloomberg-ს განუცხადა, რომ პრობლემის გამოსასწორებლად ყველა საჭირო ცვლილება განხორციელდა. Bloomberg-ის განმეორებითმა შემოწმებამ დაადასტურა, რომ ხარვეზი აღმოფხვრილია.ჯერჯერობით გაურკვეველია, იქნება თუ არა ეს ზომები საკმარისი იმ რითეილერებისა და აფილირებული პარტნიორების დასაკმაყოფილებლად, რომლებიც Phia-სთან თანამშრომლობენ. TechCrunch-ი კომენტარისთვის Phia-ს დაუკავშირდა, თუმცა პასუხი ამ დრომდე არ მიუღია.