„რა დაცინვაა“: GitHub Copilot-ის ახალი ტარიფები დეველოპერებში დიდ უკმაყოფილებას იწვევს

Microsoft-ის GitHub Copilot-ის „ოქროს ხანა“, როგორც ჩანს, დასასრულს უახლოვდება — ყოველ შემთხვევაში, ინდივიდუალური მომხმარებლებისა და მცირე გუნდებისთვის მაინც. კომპანია სააბონენტო გადასახადის ფიქსირებული მოდელიდან ტოკენების მოხმარებაზე დაფუძნებულ სისტემაზე გადადის. ამ ცვლილებამ შესაძლოა მომხმარებლების ხარჯები კატასტროფულად გაზარდოს.

მსხვილი კორპორაციებისთვის ეს ცვლილება შესაძლოა ნაკლებად მტკივნეული აღმოჩნდეს, თუმცა მცირე კომპანიები და დამოუკიდებელი დეველოპერები უკვე ფიქრობენ, როგორ დააბალანსონ ყოველთვიური ბიუჯეტი. ახალი წესები ძალაში 1 ივნისიდან შედის. მომხმარებლებს გადასახადი დაერიცხებათ არა მოთხოვნების (requests) რაოდენობის მიხედვით, არამედ იმის მიხედვით, თუ რამდენი ტოკენი დაიხარჯება მუშაობის პროცესში.

დეველოპერების ნაწილმა უკვე გამოხატა პროტესტი ისეთ პლატფორმებზე, როგორიცაა Reddit და X. ბევრი მათგანისთვის ხარჯების ზრდა შოკისმომგვრელი აღმოჩნდა. „რა დაცინვაა“, — დაწერა Reddit-ის ერთ-ერთმა მომხმარებელმა, რომლის თქმითაც, თუ აქამდე თვეში 29 დოლარს იხდიდა, ახალი მოდელით მისი ხარჯი თითქმის 750 დოლარამდე გაიზრდება. მომხმარებლის განცხადებით, ასეთი ფასი სრულიად არაგონივრულია და ის აპირებს გააუქმოს გამოწერა, რადგან ინსტრუმენტი ამ ფასად აღარ არის ეფექტური.

კიდევ ერთმა მომხმარებელმა გააზიარა სკრინშოტი, სადაც ჩანს, რომ მისი ყოველთვიური გადასახადი 50 დოლარიდან დაახლოებით 3,000 დოლარამდე გაიზარდა. „არ ველოდი, რომ ახალი საფასო მოდელი ასეთი აბსურდული იქნებოდა“, — აღნიშნავს ის.

კრიტიკა „Vibe-Coding“-ის მისამართით

მიუხედავად მწვავე რეაქციებისა, Copilot-ის ზოგიერთი მომხმარებელი კრიტიკას არ ეთანხმება. მათი აზრით, ტოკენების ასეთი დიდი რაოდენობით ხარჯვა მხოლოდ იმ შემთხვევაშია შესაძლებელი, თუ მომხმარებელმა არ იცის ინსტრუმენტის სწორად გამოყენება. კრიტიკოსები ამ პროცესს „vibe-coding“-ს უწოდებენ — როდესაც პროგრამირების მცირე ცოდნის მქონე პირები ზედმეტად ბევრ და არაეფექტურ მოთხოვნას აგზავნიან.

„მიჭირს დავიჯერო, რომ ეს განსხვავება მხოლოდ სამუშაოს სირთულით არის გამოწვეული. ასეთი კოლოსალური ციფრები მხოლოდ მაშინ მიიღება, როდესაც ხდება ე.წ. „vibe coding“ უამრავი ზედმეტი იტერაციით,“ — წერს ერთ-ერთი მომხმარებელი. მისი თქმით, ნებისმიერი პროვაიდერის პირობებში, ეს ინსტრუმენტი საკმაოდ ხელმისაწვდომია მცირე ჯგუფებისთვისაც კი, თუ მას გონივრულად გამოიყენებენ.

ეკონომიკური ფაქტორები და Microsoft-ის პასუხისმგებლობა

ზოგიერთი მომხმარებელი ყურადღებას ამახვილებს წინა მოდელის ეკონომიკურ მხარეზეც. Reddit-ზე გაჩნდა კითხვები იმის შესახებ, თუ რა მოცულობის ზარალს ნახულობდა კომპანია აქამდე. გაურკვეველია, რა თანხებს ხარჯავდა Microsoft მომხმარებლების „vibe-coding“ ექსპერიმენტების სუბსიდირებისთვის, რადგან ეს ინფორმაცია საჯარო არ არის.

ამავდროულად, ბევრი მიიჩნევს, რომ დეველოპერების უკმაყოფილება საფუძვლიანია. მათი არგუმენტით, Microsoft თავად მოუწოდებდა მომხმარებლებს ჩატბოტის აქტიური გამოყენებისკენ, ახლა კი პირობებს მკვეთრად ცვლის. ერთ-ერთი მომხმარებლის თქმით, Microsoft-მა თავად შექმნა ეს სისტემა და მაქსიმალურად გაამარტივა ტოკენების დიდი რაოდენობით ხარჯვა რთული მოთხოვნების შესრულებისას, რაც ზოგჯერ საათობით ან დღეობით გრძელდებოდა.

გამოცემა TechCrunch-მა კომენტარისთვის Microsoft-ს მიმართა, თუმცა პასუხი სტატიის გამოქვეყნებამდე არ მიუღია.