რამდენს უხდის OpenAI Microsoft-ს: გაჟონილი დოკუმენტები მილიარდიან ფინანსურ გარიგებას ამხელს

ხელოვნური ინტელექტის სფეროში აქტიური გარიგებებისა და მოსალოდნელი IPO-ს შესახებ ხმების ფონზე, OpenAI-ს ფინანსური საქმიანობის მიმართ ინტერესი სულ უფრო იზრდება. ტექ-ბლოგერ ედ ზიტრონის მიერ მოპოვებული დოკუმენტები კომპანიის ფინანსების, კერძოდ კი მისი შემოსავლებისა და გამოთვლითი სიმძლავრეების ხარჯების შესახებ ახალ დეტალებს ამხელს.

ზიტრონის ინფორმაციით, რომელიც გასაჯაროებულ დოკუმენტებს ეყრდნობა, 2024 წელს Microsoft-მა OpenAI-სგან შემოსავლის წილის სახით 493.8 მილიონი დოლარი მიიღო. 2025 წლის პირველ სამ კვარტალში კი ეს მაჩვენებელი 865.8 მილიონ დოლარამდე გაიზარდა. გავრცელებული ცნობებით, OpenAI თავისი შემოსავლის 20%-ს Microsoft-ს უზიარებს, რაც იმ მასშტაბური გარიგების ნაწილია, რომლის ფარგლებშიც ტექნოლოგიურმა გიგანტმა AI სტარტაპში 13 მილიარდ დოლარზე მეტი ინვესტიცია ჩადო. თუმცა, ეს პროცენტული მაჩვენებელი არცერთ კომპანიას ოფიციალურად არ დაუდასტურებია.

სიტუაციას ართულებს ის ფაქტი, რომ ფინანსური ნაკადი ორმხრივია. TechCrunch-ის წყაროს ცნობით, Microsoft-იც უზიარებს შემოსავალს OpenAI-ს და უბრუნებს Bing-ისა და Azure OpenAI Service-ის შემოსავლების დაახლოებით 20%-ს. Bing-ის საძიებო სისტემა OpenAI-ს ტექნოლოგიით მუშაობს, ხოლო Azure-ის სერვისი დეველოპერებსა და ბიზნესებს OpenAI-ს მოდელებზე ღრუბლოვან წვდომას სთავაზობს.

ამავე წყაროს განმარტებით, გაჟონილი დოკუმენტები ასახავს Microsoft-ის წმინდა შემოსავლის წილს და არა — მთლიანს. სხვა სიტყვებით რომ ვთქვათ, ამ ციფრებში არ შედის ის თანხები, რომლებიც Microsoft-მა OpenAI-ს Bing-ისა და Azure-ის გამოყენებისთვის გადაუხადა. Microsoft-ი ამ თანხებს შიდა ფინანსურ ანგარიშგებაში აკლებს შემოსავლის წილის მაჩვენებელს, რაც რეალური სურათის დადგენას ართულებს.

თუ ვივარაუდებთ, რომ 20%-იანი წილის შესახებ ინფორმაცია სიმართლეა, შეგვიძლია დავასკვნათ, რომ OpenAI-ს შემოსავალი 2024 წელს მინიმუმ 2.5 მილიარდი დოლარი იყო, ხოლო 2025 წლის პირველ ცხრა თვეში — 4.33 მილიარდი დოლარი. შედარებისთვის, The Information-ის ადრინდელი ანგარიშებით, კომპანიის 2024 წლის შემოსავალი 4 მილიარდ დოლარს, 2025 წლის პირველი ნახევრის კი 4.3 მილიარდ დოლარს შეადგენდა. თავად სემ ალტმენმა კი ცოტა ხნის წინ განაცხადა, რომ კომპანიის შემოსავალი წლიურ 13 მილიარდს „ბევრად აჭარბებს“ და წლის ბოლოსთვის 20 მილიარდ დოლარს მიაღწევს.

შემოსავლების პარალელურად, დოკუმენტები OpenAI-ს კოლოსალურ ხარჯებსაც ააშკარავებს. ზიტრონის ანალიზით, კომპანიამ 2024 წელს მოდელების მუშაობისთვის (inference) დაახლოებით 3.8 მილიარდი დოლარი დახარჯა. 2025 წლის პირველ ცხრა თვეში კი ეს ხარჯი თითქმის 8.65 მილიარდ დოლარამდე გაიზარდა. „Inference“ არის გამოთვლითი რესურსი, რომელიც უკვე გაწვრთნილი მოდელის მიერ პასუხების გენერირებისთვის გამოიყენება.

წყაროების ცნობით, OpenAI-ს ხარჯების სტრუქტურა არაერთგვაროვანია. მოდელების თავდაპირველი „სწავლებისთვის“ საჭირო რესურსების ხარჯი ძირითადად არაფულადია და Microsoft-ის მიერ ინვესტიციის ფარგლებში გაცემული კრედიტებით იფარება. თუმცა, მოდელების ყოველდღიური მუშაობის, ანუ „inference“-ის ხარჯი უმეტესწილად ნაღდი ფულით ანაზღაურდება.

ეს ციფრები, მართალია, სრულ სურათს არ გვაძლევს, მაგრამ მიანიშნებს, რომ OpenAI, შესაძლოა, მოდელების ოპერირებაზე იმაზე მეტს ხარჯავდეს, ვიდრე შემოსავლის სახით იღებს. ეს კი კითხვებს აჩენს ხელოვნური ინტელექტის სფეროში არსებული „ბუშტის“ შესახებ. თუკი ინდუსტრიის ლიდერი კომპანიაც კი მოგებაზე ვერ გადის, რას უნდა ნიშნავდეს ეს დანარჩენი AI კომპანიებისთვის, რომლებიც კოლოსალურ ინვესტიციებს იზიდავენ? OpenAI-მ და Microsoft-მა ამ საკითხზე კომენტარის გაკეთებაზე უარი განაცხადეს.