Reddit-ი შოპინგისთვის ხელოვნურ ინტელექტზე დაფუძნებულ ახალ საძიებო ფუნქციას ტესტავს

Reddit-მა ხუთშაბათს განაცხადა, რომ ხელოვნურ ინტელექტზე დაფუძნებულ ახალ საძიებო ინსტრუმენტს ტესტავს. ეს ფუნქცია პლატფორმის მომხმარებლების რეკომენდაციებს კომპანიის სარეკლამო და სავაჭრო პარტნიორების პროდუქტებთან აკავშირებს. აშშ-ში მცხოვრები მომხმარებლების მცირე ჯგუფი უკვე ხედავს ძიების შედეგებს, რომლებიც მოიცავს პროდუქტების ინტერაქტიულ კარუსელებს ფასებით, ფოტოებითა და პირდაპირი ბმულებით შესაბამის მაღაზიებში გადასასვლელად.

ეს სიახლე ასახავს Reddit-ის უფრო ფართო სტრატეგიას, რომელიც მიზნად ისახავს საზოგადოებაზე ორიენტირებული პლატფორმისა და ელექტრონული კომერციის შესაძლებლობების გაერთიანებას. აღნიშნული ნაბიჯი მოჰყვება გასულ წელს გაშვებულ პირველ სავაჭრო სარეკლამო პროდუქტს, სახელწოდებით Dynamic Product Ads (DPA), რომელიც მომხმარებლებს მათი ინტერესების მიხედვით პერსონალიზებულ პროდუქტებს სთავაზობს.

როგორ მუშაობს ახალი ფუნქცია

ამჟამად, ტესტირებაში მონაწილე მომხმარებლები, რომლებიც ეძებენ ისეთ ფრაზებს, როგორიცაა „საუკეთესო ხმაურის დამხშობი ყურსასმენები“ (best noise-canceling headphones) ან „ელექტრონული საჩუქრების იდეები სტუდენტისთვის“ (electronic gift ideas for a college student), ძიების შედეგების ბოლოში ნახავენ შესაბამისი პროდუქტების კარუსელს.

„ეს ფუნქცია დისკუსიებიდან პირდაპირ გამოიტანს ყველაზე რეკომენდებულ პროდუქტებს, რაც მომხმარებლებს ნებისმიერ ნივთზე მყისიერ ინფორმაციას მიაწვდის“, — ნათქვამია კომპანიის ბლოგპოსტში. „ტესტირება მიზნად ისახავს Reddit-ზე ნავიგაციის გამარტივებას ისე, რომ საზოგადოების მოსაზრებები გამოცდილების ცენტრში დარჩეს. ჩვენ გავაგრძელებთ დაკვირვებას, თუ როგორ იყენებენ ადამიანები ამ ახალ ფუნქციას და დროთა განმავლობაში დავხვეწთ მას“.

კონკურენცია და ბიზნესის ზრდის პერსპექტივები

მიუხედავად იმისა, რომ ისეთ პლატფორმებს, როგორიცაა TikTok და Instagram, დიდი ხანია ინტეგრირებული აქვთ შოპინგის ფუნქციები, Reddit ახლა ცდილობს მათ კვალს გაჰყვეს. რა თქმა უნდა, Reddit არ არის ერთადერთი ტექნოლოგიური პლატფორმა, რომელმაც ბოლო დროს ხელოვნური ინტელექტით მართული შოპინგის შესწავლა დაიწყო. მაგალითად, OpenAI-ის ChatGPT-მა გასულ სექტემბერში წარადგინა Instant Checkout ფუნქცია, რომელიც მომხმარებლებს საშუალებას აძლევს Etsy-სა და Shopify-ზე შესყიდვები უშუალოდ მიმოწერის პროცესში განახორციელონ.

ხუთშაბათის განცხადება მოჰყვა Reddit-ის აღმასრულებელი დირექტორის, სტივ ჰაფმანის გამოსვლას გასული კვირის ფინანსური ანგარიშის წარდგენისას. მან აღნიშნა, რომ პლატფორმის ხელოვნურ ინტელექტზე დაფუძნებული საძიებო სისტემა შეიძლება გახდეს ბიზნესის შემდეგი დიდი შესაძლებლობა, არა მხოლოდ პროდუქტის განვითარების, არამედ შემოსავლების ზრდის კუთხითაც.

ჰაფმანმა ასევე ხაზი გაუსვა სტატისტიკურ მონაცემებს: ძიების ყოველკვირეული აქტიური მომხმარებლების რაოდენობა გასულ წელს 30%-ით გაიზარდა და 60 მილიონიდან 80 მილიონამდე ავიდა. ამავდროულად, ხელოვნური ინტელექტით აღჭურვილი Reddit Answers ფუნქციის ყოველკვირეული აქტიური მომხმარებლების რაოდენობა 2025 წლის პირველ კვარტალში არსებული 1 მილიონიდან მეოთხე კვარტლისთვის 15 მილიონამდე გაიზარდა.