Reddit-ის CEO: AI ჩატბოტები ტრაფიკის მთავარი წყარო არ არის

Reddit-ის აღმასრულებელმა დირექტორმა, სტივ ჰაფმანმა განაცხადა, რომ ხელოვნური ინტელექტის ჩატბოტები სოციალური პლატფორმისთვის ტრაფიკის მნიშვნელოვან წყაროს არ წარმოადგენს, მიუხედავად იმისა, რომ ისეთი კომპანიები, როგორიცაა OpenAI და Google, ამ მიმართულებით პროგრესს აღწევენ.

კომპანიის 2025 წლის მესამე კვარტლის შემაჯამებელ საუბარზე ჰაფმანმა აღნიშნა, რომ Reddit-ის ტრაფიკის მთავარ მამოძრავებლად კვლავ Google-ის საძიებო სისტემა და პირდაპირი ვიზიტები რჩება. ანალიტიკოსის კითხვაზე, მოდის თუ არა ტრაფიკის 50% Google-იდან და 50% პირდაპირი წვდომიდან, ჰაფმანმა უპასუხა, რომ ეს რიცხვები „მიახლოებითია, მაგრამ საკმაოდ ახლოსაა სიმართლესთან“.

„ჩატბოტები დღეს ტრაფიკის წყარო არ არის. ვფიქრობ, ჩვენი ურთიერთობა პარტნიორ კომპანიებთან ჯანსაღია და ბოლო რამდენიმე წლის განმავლობაში ორივე მხარემ ბევრი რამ ვისწავლეთ Reddit-ის მონაცემების ღირებულებისა და ჩვენი პროდუქტების განვითარების პერსპექტივების შესახებ“, - განაცხადა ჰაფმანმა და დასძინა, რომ მოუთმენლად ელის ამ პარტნიორებთან მუშაობის გაგრძელებას.

Reddit-ს საკმაოდ რთული ურთიერთობა აქვს დიდი ენობრივი მოდელების (LLM) შემქმნელებთან. 2024 წლის მაისში კომპანიამ შეცვალა პოლიტიკა და შეზღუდა წვდომა თავის მონაცემებზე, რა დროსაც განაცხადა, რომ ნებისმიერი კომერციული გამოყენებისთვის ლიცენზიის აღება იქნებოდა საჭირო. ამავდროულად, Reddit-მა გააფორმა ხელშეკრულება OpenAI-სთან, რათა ამ უკანასკნელმა მისი მონაცემები მოდელების გასავარჯიშებლად გამოიყენოს. კომპანიას ასევე აქვს პარტნიორული შეთანხმება Google-თან, თუმცა, მეორე მხრივ, სასამართლო დავაშია ჩართული ისეთ AI კომპანიებთან, როგორებიცაა Anthropic და Perplexity.

ფინანსური თვალსაზრისით, კომპანიამ პოზიტიური კვარტალი დააფიქსირა. შემოსავალმა 585 მილიონი დოლარი შეადგინა, რაც წინა წლის ანალოგიურ პერიოდთან შედარებით 68%-იანი ზრდაა. Reddit-ს ყოველდღიურად 116 მილიონი, ხოლო ყოველკვირეულად 444 მილიონი უნიკალური აქტიური მომხმარებელი ჰყავდა, რაც 20%-იან წლიურ ზრდას წარმოადგენს. განსაკუთრებით აღსანიშნავია საერთაშორისო მომხმარებლების 31%-იანი ზრდა. კომპანიის ცნობით, სოციალურ ქსელს ყოველკვირეულად 190 მილიონზე მეტი ამერიკელი სტუმრობს.

Reddit აგრძელებს ინვესტირებას შიდა საძიებო სისტემის გაუმჯობესებაში. ჰაფმანის თქმით, საძიებო მოთხოვნების 20%-ს უკვე კომპანიის ხელოვნურ ინტელექტზე დაფუძნებული ფუნქცია „Answers“ და ძირითადი საძიებო ველი ამუშავებს. მესამე კვარტალში Reddit-ზე ყოველკვირეულად 75 მილიონმა ადამიანმა მოიძია ინფორმაცია. კომპანია გეგმავს ხელოვნური ინტელექტისა და ძირითადი საძიებო სისტემის სრულ ინტეგრაციას, რაც უახლოეს კვარტლებში განხორციელდება.

გარდა ამისა, Reddit ახალ, გამარტივებულ რეგისტრაციის პროცესს ტესტავს, რათა გაზარდოს ახალი მომხმარებლების ჩართულობა. „ჩვენ გვინდა, რომ მათ პირველივე სესიაზე დაინახონ, რამდენად საოცარია Reddit და რომ აქ მათთვის საინტერესო კონტენტია. ჩვენი მიზანია, მომხმარებლები სწრაფად დავაკავშიროთ მათთვის რელევანტურ შინაარსთან“, - აღნიშნა ჰაფმანმა.