შიდა დოკუმენტები: Meta თაღლითური რეკლამებიდან 16 მილიარდი დოლარის შემოსავალს პროგნოზირებს

Meta-ს შიდა დოკუმენტაციის თანახმად, კომპანია 2024 წელს თაღლითური სქემებისა და აკრძალული პროდუქტების რეკლამიდან 16 მილიარდი დოლარის შემოსავალს ელოდება. ეს თანხა კომპანიის სარეკლამო შემოსავლების დაახლოებით 10%-ს შეადგენს და სერიოზულ კონკურენციას უქმნის ლეგიტიმურ რეკლამის განმთავსებლებს.

პრობლემის საფუძველია Meta-ს „სასჯელო განაკვეთის“ სისტემა. ამ მექანიზმის მიხედვით, საეჭვო რეკლამის განმთავსებლები არ იბლოკებიან, არამედ მათ უბრალოდ უფრო მაღალი ფასის გადახდა უწევთ რეკლამის განსათავსებლად. შედეგად, ისინი რჩებიან სარეკლამო აუქციონებში და კონკურენციას უწევენ კეთილსინდისიერ კომპანიებს, რომლებმაც არც კი იციან, რომ გაბერილ ფასებს ებრძვიან.

შიდა დოკუმენტების მიხედვით, Meta-ს პლატფორმებზე — Facebook, Instagram და WhatsApp — ყოველდღიურად დაახლოებით 15 მილიარდი „მაღალი რისკის“ თაღლითური რეკლამა ჩნდება. მხოლოდ იმ რეკლამებიდან, რომლებიც აშკარა თაღლითობის ნიშნებს შეიცავს, კომპანია წელიწადში დაახლოებით 7 მილიარდ დოლარს გამოიმუშავებს.

კომპანიის მიდგომა დამნაშავეების მიმართ საკმაოდ ლოიალურია. Meta ბლოკავს რეკლამის განმთავსებელს მხოლოდ მაშინ, როდესაც ავტომატიზებული სისტემები მინიმუმ 95%-იანი ალბათობით ადასტურებენ, რომ ის თაღლითობას ეწევა. ამ ზღვარს ქვემოთ მყოფი ანგარიშები კი უბრალოდ უფრო მაღალ ტარიფს იხდიან და კამპანიების გაგრძელებას ახერხებენ.

ერთ-ერთ შიდა მიმოხილვაში აღნიშნულია, რომ Meta-ს პლატფორმებზე თაღლითური სქემების რეკლამირება უფრო ადვილია, ვიდრე Google-ში, თუმცა დოკუმენტი ამის მიზეზებს არ განმარტავს. ამასთან, წლის პირველ ნახევარში კომპანიამ შეზღუდა თაღლითობასთან ბრძოლის ღონისძიებები და მხოლოდ ისეთ ქმედებებს ახორციელებდა, რომელთა ღირებულებაც მთლიანი შემოსავლის 0.15%-ს, ანუ დაახლოებით 135 მილიონ დოლარს არ აღემატებოდა. ერთ-ერთი მენეჯერი წერდა: „ფრთხილად ვიყოთ. ჩვენ შემოსავლების კონკრეტული ჩარჩოები გვაქვს“.

მცირე რეკლამის განმთავსებლები დასაბლოკად ფინანსური თაღლითობისთვის რვაჯერ უნდა იყვნენ შემჩნეულნი. ამასთან, ზოგიერთ მსხვილ, „მაღალი ღირებულების ანგარიშს“ 500-ზე მეტი დარღვევა დაუგროვდა, თუმცა Meta-მ ისინი მაინც არ დახურა. კომპანიის პრეზენტაციის მიხედვით, აშშ-ში განხორციელებული წარმატებული თაღლითური სქემების ერთი მესამედი სწორედ Meta-ს პლატფორმებთან იყო დაკავშირებული.

დიდი ბრიტანეთის საგადახდო სისტემების მარეგულირებლის მონაცემებით, 2023 წელს გადახდებთან დაკავშირებული თაღლითობის შემთხვევების 54% Meta-ს პროდუქტებს უკავშირდებოდა. ამასთან, Reuters-ის მიერ განხილული დოკუმენტების თანახმად, აშშ-ის ფასიანი ქაღალდებისა და ბირჟების კომისია (SEC) Meta-ს წინააღმდეგ გამოძიებას აწარმოებს ფინანსური თაღლითობის რეკლამირების გამო.

კომპანიის წარმომადგენელმა, ენდი სტოუნმა, განაცხადა, რომ შიდა შეფასებები „უხეში და ზედმეტად განზოგადებულია“ და ბევრ ლეგიტიმურ რეკლამასაც მოიცავს. მან უარი თქვა განახლებული მონაცემების წარმოდგენაზე, თუმცა აღნიშნა, რომ ბოლო 18 თვის განმავლობაში Meta-მ 58%-ით შეამცირა მომხმარებელთა საჩივრები თაღლითურ რეკლამებზე და 2025 წელს 134 მილიონზე მეტი ასეთი კონტენტი წაშალა.

სტოუნის თქმით, 0.15%-იანი მაჩვენებელი არა მკაცრი ლიმიტი, არამედ შემოსავლების პროგნოზზე დაფუძნებული ციფრი იყო. მისივე განმარტებით, „სასჯელო განაკვეთის“ პროგრამის მიზანი თაღლითების კონკურენტუნარიანობის შემცირება იყო, რამაც ტესტირებისას გამოიწვია საჩივრების კლება და სარეკლამო შემოსავლების უმნიშვნელო შემცირება.

სტრატეგიული დოკუმენტების მიხედვით, Meta გეგმავს, შეამციროს შემოსავლის წილი თაღლითობის, არალეგალური აზარტული თამაშებისა და აკრძალული საქონლის რეკლამიდან. კომპანიის მიზანია, 2024 წლის 10.1%-იანი მაჩვენებელი 2025 წლის ბოლოსთვის 7.3%-მდე, 2026 წლის ბოლოსთვის 6%-მდე, ხოლო 2027 წელს 5.8%-მდე დაიყვანოს.