SK Hynix-მა აშშ-ის ისტორიაში ყველაზე მასშტაბური უცხოური IPO განახორციელა და $26.5 მილიარდი მოიზიდა

ხელოვნური ინტელექტის ჩიპების ბუმმა უოლ-სტრიტზე ახალი ისტორიული ეტაპი დააფიქსირა. სამხრეთკორეულმა მეხსიერების ჩიპების გიგანტმა, SK Hynix-მა, აშშ-ის ბაზარზე დებიუტისას 26.5 მილიარდი დოლარის (40 ტრილიონი ვონი) მოზიდვა შეძლო.

კომპანიამ 177.9 მილიონი ამერიკული დეპოზიტარული აქცია (ADR) თითო 149 დოლარად გაყიდა. ეს სტრუქტურა ამერიკელ ინვესტორებს საშუალებას აძლევს, აქციები სეულის ბირჟაზე არსებული სრული ფასის დაახლოებით მეათედში შეიძინონ. აღნიშნული გარიგება აშშ-ის ისტორიაში არამერიკული კომპანიის მიერ განხორციელებული ყველაზე დიდი IPO-ა, რომელმაც 2014 წელს Alibaba-ს მიერ დამყარებულ 25-მილიარდიან რეკორდს გადააჭარბა.

Nasdaq-ის ბირჟაზე ვაჭრობა პარასკევს, 10 ივლისს, დროებითი სიმბოლოთი SKHYV დაიწყო. ორშაბათიდან, 13 ივლისიდან კი აქციები ოფიციალური ტიიკერით — SKHY ივაჭრება. ამერიკელი ინვესტორების მხრიდან ინტერესი საკმაოდ მაღალია: ვაჭრობის გახსნისას აქციის ფასი IPO-ს ღირებულებაზე 14%-ით მეტი იყო და ზრდა პარასკევის განმავლობაშიც გაგრძელდა. ეს იმის მიუხედავად მოხდა, რომ აშშ-ში აქციების ფასი 2.7%-ით მეტი იყო სეულის ბირჟის ბოლო სამი დღის საშუალო მაჩვენებელზე.

მედიაში გავრცელებული ინფორმაციით, მოთხოვნა შეთავაზებულ აქციებზე შვიდჯერ აღემატებოდა ხელმისაწვდომ რაოდენობას. ეს განსაკუთრებით შთამბეჭდავია იმ ფონზე, რომ კორეული კომპანიები გლობალურ კონკურენტებთან შედარებით ტრადიციულად დაბალ ფასად ივაჭრებიან. ამ ფენომენს „კორეულ დისკონტს“ (Korea Discount) უწოდებენ. ინვესტორები ამას ხშირად რთული კორპორაციული მართვის სტრუქტურებით, აქციონერებისთვის დაბალი უკუგებით, რეგულატორული გაურკვევლობითა და ჩრდილოეთ კორეასთან დაკავშირებული გეოპოლიტიკური რისკებით ხსნიან.

თუმცა, SK Hynix-ზე ეს დისკონტი აშკარად არ ასახულა, რაც განპირობებულია მისი როლით მაღალი გამტარობის მეხსიერების (HBM) ჩიპების წარმოებაში. HBM კრიტიკული კომპონენტია ხელოვნური ინტელექტის GPU პროცესორებისთვის. ამჟამად Nvidia სწორედ SK Hynix-ს ეყრდნობა, როგორც ერთ-ერთ მთავარ მომწოდებელს.

ინვესტიციების მიმართულებები

ოფიციალური დოკუმენტაციის მიხედვით, ამერიკელი ინვესტორებისგან მოზიდული თანხები სამ ძირითად მიზანს მოხმარდება:

• ახალი ქარხანა (fab) სამხრეთ კორეაში: მშენებლობა უკვე მიმდინარეობს ხელოვნური ინტელექტით გამოწვეული მეხსიერების ჩიპების გლობალური დეფიციტის აღმოსაფხვრელად;
• ახალი შესაფუთი (packaging) საწარმო: საწარმოო სიმძლავრეების გაზრდა უშუალოდ სამხრეთ კორეაში;
• EUV სკანერები: მაღალტექნოლოგიური დანადგარები, რომლებიც მომავალი თაობის ჩიპების წარმოებას ხდის შესაძლებელს.

აშშ-ის მოწოდება წარმოების ლოკალიზაციისკენ

პარალელურად, აშშ-ის ვაჭრობის მდივანმა, ჰოვარდ ლატნიკმა, Micron-ის ღონისძიებაზე სიტყვით გამოსვლისას მნიშვნელოვანი გზავნილი გააჟღერა არა მხოლოდ ამერიკული კომპანიებისთვის, არამედ მთელი ინდუსტრიისთვის. მან აღნიშნა, რომ უკვე აწარმოებს მოლაპარაკებებს Samsung-თან და SK Hynix-თან აშშ-ში ახალი ქარხნების აშენების თაობაზე. ინიციატივის მიზანია, რომ სამხრეთ კორეამ აღარ შეინარჩუნოს ერთპიროვნული დომინანტური პოზიცია ამ სტრატეგიულ ტექნოლოგიაში.

ამერიკული კომპანია Micron უკვე ჩაერთო ამ პროცესში და დააანონსა 250 მილიარდი დოლარის ინვესტიცია აშშ-ში წარმოების გასაფართოებლად. კომპანიის განცხადებით, ეს შექმნის 90,000-ზე მეტ სამუშაო ადგილს და უზრუნველყოფს უახლესი ჩიპების წარმოებას ამერიკის ტერიტორიაზე. ლატნიკის მოთხოვნა განსაკუთრებით საგულისხმოა იმის გათვალისწინებით, რომ ორივე კორეულმა გიგანტმა ახლახან პირობა დადო, რომ 550 მილიარდ დოლარზე მეტს დააბანდებს უშუალოდ სამხრეთ კორეის საწარმოო სიმძლავრეებში.