Snap-ის აქციების ფასი მკვეთრად დაეცა ძვირადღირებული AR სათვალეების წარდგენის შემდეგ

Snap-ის მიერ დიდი ხნის განმავლობაში დაანონსებული AR სათვალეების, Specs-ის დებიუტი წარმატებული არ აღმოჩნდა. კომპანიის აქციების ტრაექტორია ბოლო პერიოდში ისედაც არასახარბიელო იყო — გასული წლის განმავლობაში მათი ღირებულება 30%-ით შემცირდა.

Specs-ის პრეზენტაციის შემდეგ აქციების ფასი კიდევ 5%-ზე მეტით დაეცა. თუ სამშაბათს ერთი აქციის ფასი 5,86 დოლარს შეადგენდა, ოთხშაბათს დილით მან მინიმალურ ნიშნულს, 4,83 დოლარს მიაღწია. ამ სტატიის მომზადების მომენტისთვის, აქციებს ჯერ კიდევ არ დაუბრუნებიათ ის პოზიცია, რომელიც მათ ახალი პროდუქტის წარდგენამდე ეკავათ.

Snap-ის ახალ სმარტ-სათვალეებთან დაკავშირებით, რომლებზეც კომპანია ათ წელზე მეტია მუშაობს, მთავარ პრობლემას მათი ღირებულება წარმოადგენს. კომპანიის განცხადებით, პროდუქტის საცალო ფასი თითქმის 2,200 დოლარი იქნება. აღსანიშნავია, რომ Snap-ის ძირითადი მომხმარებლები თინეიჯერები არიან, რომლებსაც, როგორც წესი, მსგავსი ფინანსური რესურსი არ გააჩნიათ. სწორედ ამ ფაქტორმა გააჩინა კითხვები ახალი პროდუქტის მომგებიანობის შესახებ.

სამშაბათს, CNBC-სთან ინტერვიუში, Snap-ის აღმასრულებელმა დირექტორმა, ევან შპიგელმა, რომელსაც თავად ეკეთა ახალი სათვალე, მაღალ ფასთან დაკავშირებულ კითხვას უპასუხა:

„Specs-ის აღქმის საუკეთესო გზაა მისი განხილვა, როგორც კომპიუტერის. შესაბამისად, მისი ფასი სხვა მაღალი კლასის კომპიუტერების ან ლეპტოპების ღირებულების ანალოგიურია“.

შპიგელმა ფასი იმითაც გაამართლა, რომ Specs-ი AR ბაზარზე უნიკალურ ადგილს იკავებს. ის მოთავსებულია Meta-ს Ray-Ban-ის სათვალეებსა (რომლებიც გაცილებით იაფია, თუმცა ნაკლები გამოთვლითი სიმძლავრე აქვთ) და Apple Vision Pro-ს მსგავს მასიურ მოწყობილობებს შორის, რომლებიც მძლავრია, მაგრამ ძალიან ძვირი. შპიგელის თქმით, მისი პროდუქტი არის როგორც „მოსახერხებელი სატარებლად, ისე წარმოუდგენლად ეფექტური იმერსიული გამოთვლებისთვის“.