ტექნოლოგიური სექტორის რყევები: 2024 წლის მასშტაბური დათხოვნების სრული ქრონიკა

2024 წელს ტექნოლოგიურ სექტორში სამსახურიდან თანამშრომლების მასობრივი დათხოვნის ტენდენცია გრძელდება. როგორც მსხვილი ტექნოლოგიური გიგანტები, ისე სტარტაპები, მთელი წლის განმავლობაში აგრძელებენ შტატების შემცირებას, რაც ინდუსტრიაში მიმდინარე ცვლილებებსა და გამოწვევებზე მიუთითებს.

ივლისში დათხოვნების ტალღა კვლავ გაგრძელდა. Tesla-მ პროგრამული უზრუნველყოფის, სერვისებისა და ინჟინერიის განყოფილებებიდან თანამშრომლების ნაწილი დაითხოვა. Rivian-მა სამუშაო ძალის 1% შეამცირა, ხოლო Apple-მა Vision Pro-ს გუნდიდან გაათავისუფლა კადრები. Microsoft-მა Azure-ისა და HoloLens-ის გუნდებში მოახდინა შემცირება, SAP-მა კი რესტრუქტურიზაციის ფარგლებში 200-ზე მეტი თანამშრომელი დაითხოვა.

ივნისში ინდურმა EdTech კომპანია Byju’s-მა 200-მდე თანამშრომელი გაათავისუფლა, ხოლო ელექტრომობილების მწარმოებელმა Fisker-მა, რომელიც გაკოტრების პროცესშია, ასობით თანამშრომელი დაითხოვა სამსახურიდან.

მაისის თვეში Microsoft-მა კვლავ განახორციელა შემცირებები, ამჯერად Azure-ისა და Mission Engineering-ის გუნდებში. Google-მა თავისი ძირითადი და ღრუბლოვანი ტექნოლოგიების გუნდებიდან 500-ზე მეტი თანამშრომელი დაითხოვა. Tesla-მ კი Supercharger-ის, პოლიტიკისა და ახალი პროდუქტების განყოფილებების თანამშრომლები გაათავისუფლა. ამავე თვეში Indeed-მა პერსონალის 8% შეამცირა, Foursquare-მა – 10%, Lucrin-მა – 20%, ხოლო MainStreet-მა – 30%.

აპრილი ერთ-ერთი ყველაზე აქტიური თვე იყო. Tesla-მ გლობალურად სამუშაო ძალის 10%-ზე მეტის დათხოვნის შესახებ გამოაცხადა, რაც დაახლოებით 14,000 თანამშრომელს შეეხო. Google-მა სხვადასხვა დეპარტამენტიდან, მათ შორის Flutter-ის, Dart-ისა და Python-ის გუნდებიდან, გაათავისუფლა თანამშრომლები. Apple-მა კი თვითმართვადი მანქანის პროექტის, Project Titan-ის, გაუქმების შემდეგ 614 თანამშრომელი დაითხოვა. Rivian-მა პერსონალის 1% შეამცირა, ხოლო Take-Two Interactive-მა, Grand Theft Auto-ს შემქმნელმა, – 5%.

მარტში შვედურმა ტელეკომუნიკაციების გიგანტმა Ericsson-მა შვედეთში 1,200 სამუშაო ადგილის შემცირების გეგმა წარადგინა. Dell-მა დაახლოებით 6,000 თანამშრომელი დაითხოვა, ხოლო Fisker-მა, ფინანსური პრობლემების ფონზე, პერსონალის 15% გაათავისუფლა.

თებერვალში Sony-მ PlayStation-ის განყოფილებიდან 900 თანამშრომელი დაითხოვა, რაც გუნდის 8%-ს შეადგენდა. Cisco-მ გლობალურად სამუშაო ძალის 5%-ის შემცირების შესახებ განაცხადა. Nike-მა, რესტრუქტურიზაციის ფარგლებში, პერსონალის 2% (1,600-ზე მეტი ადამიანი) გაათავისუფლა. Instacart-მა თანამშრომლების 7% (250 ადამიანი) დაითხოვა, Grammarly-მ – 230, ხოლო Toast-მა – 550.

2024 წლის დასაწყისი, იანვარი, განსაკუთრებით მასშტაბური შემცირებებით გამოირჩა. Google-მა ათასზე მეტი თანამშრომელი გაათავისუფლა სხვადასხვა განყოფილებიდან, მათ შორის აპარატურის, სარეკლამო გაყიდვებისა და YouTube-ის გუნდებიდან. Amazon-მა ასობით თანამშრომელი დაითხოვა Prime Video, MGM Studios და Twitch-ის პლატფორმებიდან. Microsoft-მა კი Activision Blizzard-ისა და Xbox-ის გუნდებიდან 1,900 თანამშრომელი გაუშვა სამსახურიდან.

იანვარში ასევე მნიშვნელოვანი შემცირებები განხორციელდა სხვა კომპანიებშიც. Unity-მ პერსონალის 25% (1,800 ადამიანი) დაითხოვა, Discord-მა – 17% (170 ადამიანი), eBay-მ – 9% (1,000 ადამიანი), Salesforce-მა – 700, ხოლო გერმანულმა პროგრამული უზრუნველყოფის გიგანტმა SAP-მა 8,000 თანამშრომლის დათხოვნის გეგმა გამოაცხადა. ამავე პერიოდში შემცირებები შეეხო ისეთ კომპანიებს, როგორიცაა iRobot (31%), Brex (20%), Flexport (20%), TikTok და Wayfair.