Tesla-ს ავტოპილოტის საქმეზე სასამართლომ კომპანიას 200 მილიონი დოლარის გადახდა დააკისრა

მაიამის ფედერალურმა სასამართლომ Tesla-ს 2019 წლის ტრაგიკულ ავტოსაგზაო შემთხვევაში ნაწილობრივი პასუხისმგებლობა დააკისრა. კომპანიას ჯამში 242.5 მილიონი დოლარის გადახდა მოუწევს, საიდანაც 200 მილიონი სადამსჯელო ჯარიმაა.

სასამართლო პროცესი სამი კვირის განმავლობაში მიმდინარეობდა და უკავშირდებოდა ინციდენტს, რომელშიც 20 წლის ნაიბელ ბენავიდეს ლეონი დაიღუპა, ხოლო მისი მეგობარი დილონ ანგულო მძიმედ დაშავდა. ჟიურიმ დაადგინა, რომ პასუხისმგებლობის ორი მესამედი მძღოლს ეკისრება, ხოლო ერთი მესამედი - Tesla-ს.

მოსარჩელეების ადვოკატის, ბრეტ შრაიბერის განცხადებით, Tesla-მ ავტოპილოტი შექმნა მხოლოდ კონტროლირებადი გზებისთვის, თუმცა განზრახ არ შეზღუდა მისი გამოყენება სხვა ადგილებში. ამასთან, ილონ მასკი აცხადებდა, რომ ავტოპილოტი ადამიანზე უკეთ მართავდა მანქანას.

Tesla-მ განაცხადა, რომ აპირებს გადაწყვეტილების გასაჩივრებას, რადგან მიიჩნევს, რომ სასამართლო პროცესში მნიშვნელოვანი სამართლებრივი შეცდომები და დარღვევები იყო. კომპანიის თქმით, ვერც ერთი მანქანა 2019 წელს და ვერც დღეს ვერ აიცილებდა ამ შეჯახებას.

ეროვნულმა სატრანსპორტო უსაფრთხოების საბჭომ (NTSB) ჯერ კიდევ 2020 წელს დაადგინა, რომ Tesla-სა და მასკის განცხადებებმა ავტოპილოტის შესაძლებლობების შესახებ გამოიწვია მძღოლების ზედმეტი თვითდაჯერებულობა სისტემის მიმართ.

აღსანიშნავია, რომ ამ პროცესის პარალელურად Tesla ოსტინში, ტეხასის შტატში, ნერგავს თავის პირველ რობოტაქსების ქსელს, რომელიც იყენებს კომპანიის უფრო განვითარებულ მძღოლის დამხმარე სისტემას, სახელწოდებით Full Self-Driving.