Warner Bros. უჩივის Midjourney-ს სუპერმენის და ბეტმენის AI გამოსახულებების გამო

კინოკომპანია Warner Bros. სასამართლოში უჩივის ხელოვნური ინტელექტის სტარტაპ Midjourney-ს საავტორო უფლებების დარღვევის გამო. კომპანია აცხადებს, რომ Midjourney მომხმარებლებს საშუალებას აძლევს, უნებართვოდ შექმნან სუპერმენის, ბეტმენის და ბაგზ ბანის მსგავსი პერსონაჟების გამოსახულებები და ვიდეოები.

Warner Bros.-ის განცხადებით, Midjourney-მ შეგნებულად ჩაიდინა კანონდარღვევა. მიუხედავად იმისა, რომ კომპანიას ადრე ჰქონდა დაწესებული შეზღუდვები საავტორო უფლებებით დაცულ კონტენტზე, მოგვიანებით ეს შეზღუდვები მოხსნა. სარჩელში ნათქვამია, რომ Midjourney-მ მიიღო გააზრებული და მოგებაზე ორიენტირებული გადაწყვეტილება, არ დაეცვა საავტორო უფლებების მფლობელთა ინტერესები.

Warner Bros. ითხოვს კომპენსაციას, უკანონო საქმიანობით მიღებული მოგების დაბრუნებას და დარღვევების დაუყოვნებლივ შეწყვეტას. აღსანიშნავია, რომ მსგავსი სარჩელი 2023 წლის ივნისში Walt Disney-მ და Universal-მაც შეიტანეს Midjourney-ის წინააღმდეგ, სადაც საუბარი იყო დართ ვეიდერის, ბარტ სიმპსონის და შრეკის პერსონაჟებზე.

Midjourney-ის პოზიციით, მათი AI მოდელების დატრენინგება დაცული ნამუშევრების გამოყენებით კანონიერია აშშ-ს საავტორო სამართლის „სამართლიანი გამოყენების" დოქტრინის ფარგლებში. კომპანიას ჯერჯერობით არ გაუკეთებია ოფიციალური კომენტარი აღნიშნულ სარჩელთან დაკავშირებით.