Y Combinator-ის გენერალური დირექტორი AI აგენტებზე წელიწადში 200 000 დოლარამდე ხარჯავს

Y Combinator-ის გენერალურმა დირექტორმა, გარი ტანმა, წარსულში ხუმრობით აღიარა, რომ „კიბერფსიქოზით“ იტანჯება და ხანდახან ძილიც კი ეკარგება იმ აღფრთოვანების გამო, რომელსაც ხელოვნური ინტელექტის აგენტებთან მუშაობა ჰგვრის. უოლტერ აიზეკსონის პოდკასტის, „The Builders“-ის ახალ ეპიზოდში, ტანმა საკუთარ გატაცებას კონკრეტული ფასიც დაადო. მისი თქმით, ტოკენებზე წელიწადში დაახლოებით 100 000-დან 200 000 დოლარამდე ხარჯავს.

ტანი AI აგენტებს უამრავი სამუშაო პროექტისა და კოდირების ამოცანებისთვის იყენებს. მან GitHub-ზე საჯაროდ გააზიარა საკუთარი 23 Claude Code უნარის ნაკრები, სახელწოდებით gstack. ეს მცდელობა მიზნად ისახავს სხვებს დაანახოს, თუ რეალურად რისი გაკეთება შეუძლიათ ხელოვნური ინტელექტის აგენტებს.

ერთის მხრივ, ის აგენტს ისევე იყენებს, როგორც ბევრი სხვა მომხმარებელი: აიზეკსონის პოდკასტის გამოსაკვლევად და იმ კითხვებისთვის მოსამზადებლად, რომლებიც შესაძლოა მას დაუსვან. მეორეს მხრივ, აგენტი მას პირადი ცხოვრების მართვაშიც ეხმარება. ტანის განცხადებით, AI-მ წაიკითხა მისი ყველა ელექტრონული ფოსტა, Dropbox-ის ფაილები და Apple Notes-ის ჩანაწერებიც კი, მათ შორის 20 წლის წინანდელი თერაპიის ჩანაწერებიც.

AI აგენტი, როგორც პერსონალური დამხმარე

ტანი AI აგენტების გამოყენებას აღწერს, როგორც დახმარებას თითქმის ყველაფერში, რასაც ადამიანი ყოველდღიურ ცხოვრებაში აკეთებს, ოღონდ უფრო ავტონომიურ რეჟიმში. ის ამას ადარებს „ჯიმინი კრიკეტს“ (Jiminy Cricket), რომელიც მუდამ მხარზე გიზით. აგენტმა იცის მომხმარებლის შესახებ ყველაფერი და მზად არის დახმარებისთვის. მას შეუძლია მოვლენებს წინ გაუსწროს და შესთავაზოს იდეები ან დაეხმაროს ადამიანს ისეთი დეტალების დანახვაში, რომლებიც ერთი შეხედვით შეუმჩნეველია.

როგორც OpenClaw-ის ადრეული მომხმარებელი, ტანი მიიჩნევს, რომ AI აგენტებს არ უნდა მოვექცეთ ისე, როგორც ტრადიციულ პროგრამულ უზრუნველყოფას. მისი დაკვირვებით, ზოგიერთი ადამიანი იმდენად არის შეწუხებული უსაფრთხოებისა და განმეორებადობის საკითხებით, რომ რეალურად კარგავს AI აგენტთან მუშაობის იმ მშვენიერ მხარეებს, რომლებიც მას ადამიანთან ძალიან ამსგავსებს.

შიდა კორპორაციული გამოყენება Y Combinator-ში

ტანის თქმით, Y Combinator-ში ასევე იყენებენ აგენტს, რომელიც ორგანიზაციის მუშაობის სტილს სრულიად ცვლის. მათ შექმნეს შიდა AI აგენტი, სახელად „Stray Light“, რომელსაც გარკვეული პიროვნული მახასიათებლები და „კომპანიის ტვინი“ გააჩნია. მას აქვს სრული კონტექსტი ყველა იმ დამფუძნებლის შესახებ, რომლებსაც აქსელერატორმა ოდესმე მხარი დაუჭირა, იცის ყველა ელექტრონული წერილი და ყველა მიღებული განაცხადი.

მომავლის ხედვა და გამოწვევები

ტანი, რომელიც ტექნოლოგიების დიდი მოყვარულია, დარწმუნებულია, რომ პერსონალური AI აგენტები საბოლოოდ მეინსტრიმი გახდება, თუკი ერთი მთავარი პრობლემა მოგვარდება: ხარჯები უნდა შემცირდეს. ის აღიარებს, რომ ამჟამად ეს ძალიან ძვირია და ის თანხა, რომელსაც თავად ხარჯავს, არის „გიჟური პრივილეგია“, რომელიც ყველასთვის ხელმისაწვდომი არ არის.

თუმცა, გამოსავალი არც „Big Tech“ კომპანიების მიერ კონტროლირებადი უფასო აგენტებია. ტექნოლოგიების მომავალზე საუბრისას მან აღნიშნა, რომ Meta-ს მსგავსი გიგანტები აკონტროლებენ ალგორითმებს, რაც ბევრს არ მოსწონს. ამის ნაცვლად, ტანი მხარს უჭერს პერსონალური AI-ს იდეას, რომელსაც თავად მომხმარებელი აკონტროლებს და აპროგრამებს.