Adobe-მ Photoshop-სა და Express-ში ხელოვნური ინტელექტის ასისტენტები დანერგა

კომპანია Adobe-მ თავისი Creative Cloud პროდუქტებისთვის, Express-ისა და Photoshop-ისთვის, ხელოვნური ინტელექტის (AI) ახალი ასისტენტები გამოუშვა, რომლებიც მომხმარებლებს გამოსახულების შექმნასა და რედაქტირებაში დაეხმარება.

ბევრი კომპანიისგან განსხვავებით, რომლებიც AI ასისტენტებს, როგორც წესი, პროგრამის გვერდითა პანელში ათავსებენ, Adobe-მ Express-ისთვის სრულიად ახალი რეჟიმი შექმნა. ეს რეჟიმი მომხმარებლებს საშუალებას აძლევს, ტექსტური ბრძანებების გამოყენებით ახალი დიზაინი და გამოსახულებები შექმნან. მომხმარებელს შეუძლია, მარტივად გადაერთოს AI რეჟიმსა და Express-ის სტანდარტულ სამუშაო გარემოს შორის, სადაც რედაქტირების ტრადიციული ინსტრუმენტებია ხელმისაწვდომი.

რაც შეეხება Photoshop-ის ახალ ასისტენტს, ის ამჟამად დახურული ბეტა-ტესტირების ფაზაშია და სტანდარტულად, გვერდითა პანელშია განთავსებული. Adobe-ს განცხადებით, ასისტენტს შეუძლია ფენების (layers) აღქმა, ობიექტების ავტომატურად მონიშვნა და ნიღბების (masks) შექმნა. კომპანიის თქმით, მომხმარებლებს ასევე შეეძლებათ, ასისტენტს დაავალონ ისეთი რუტინული ამოცანების შესრულება, როგორიცაა ფონის მოშორება ან ფერების შეცვლა.

Adobe-ს გენერაციული AI-ის ვიცე-პრეზიდენტმა, ალექსანდრუ კოსტინმა TechCrunch-თან საუბარში განაცხადა, რომ Express-ში განსხვავებული რეჟიმის შექმნის გადაწყვეტილება მიზნად ისახავდა სტუდენტებისა და პროფესიონალების მოზიდვას. მისი თქმით, კომპანიას სურს შეამოწმოს, შეძლებენ თუ არა მომხმარებლები სასურველი შედეგის მიღწევას ტრადიციულ ინტერფეისზე გადართვის გარეშე. „ვფიქრობთ, ეს ორ რეჟიმს შორის გადართვის მიდგომა, რომელიც ორივე სამყაროს საუკეთესო მხარეებს აერთიანებს, ტექნოლოგიას ერთდროულად ხელმისაწვდომსა და კონტროლირებადს გახდის“, - აღნიშნა კოსტინმა.

კომპანია ასევე მუშაობს ახალი ტიპის ასისტენტზე, სახელწოდებით „Project Moonlight“. ეს პროექტი მიზნად ისახავს Adobe-ს სხვადასხვა ინსტრუმენტის ასისტენტების კოორდინირებას და შემქმნელის სოციალურ არხებთან დაკავშირებას მისი სტილის უკეთ გასაანალიზებლად. პროექტი განვითარების ადრეულ ეტაპზეა და ამჟამად დახურულ ბეტა-ტესტირებაშია.

Adobe ასევე განიხილავს Adobe Express-ის ChatGPT-სთან დაკავშირების შესაძლებლობას OpenAI-ის API-ის გამოყენებით. ეს მომხმარებლებს საშუალებას მისცემს, დიზაინი პირდაპირ ChatGPT-ის ინტერფეისში შექმნან. ამასთან ერთად, კომპანიამ Creative Cloud-ის სხვა პროგრამებისთვისაც დააანონსა სიახლეები.

Photoshop-ის მომხმარებლებს ახლა უკვე შეუძლიათ, გენერაციული შევსების (generative fill) ფუნქციისთვის მესამე მხარის მოდელები გამოიყენონ, როგორიცაა Google-ის Gemini 2.5 flash და Black Forest Labs-ის FLUX.1 Kontext. ეს ფუნქცია ობიექტების წაშლისა და გამოსახულების გაფართოებისთვის გამოიყენება. გარდა ამისა, ვიდეორედაქტორ Premiere Pro-ში დაემატა ხელოვნურ ინტელექტზე დაფუძნებული ობიექტის ნიღბის ფუნქცია, რომელიც მომხმარებლებს ობიექტებისა და ადამიანების მარტივად მონიშვნის საშუალებას მისცემს ეფექტების დასამატებლად ან ფერების კორექციისთვის.