AI სტარტაპი Cursor $50-მილიარდიანი შეფასებით $2 მილიარდზე მეტი ინვესტიციის მოზიდვას გეგმავს

ხელოვნური ინტელექტის მეშვეობით კოდის წერის სტარტაპი Cursor დაფინანსების ახალ რაუნდს უახლოვდება. ოთხი ინფორმირებული წყაროს თანახმად, ოთხი წლის წინ დაარსებული კომპანია სულ მცირე 2 მილიარდი დოლარის ახალი კაპიტალის მოზიდვას აპირებს. მოსალოდნელია, რომ ფინანსურ რაუნდს არსებული ინვესტორები, Thrive და Andreessen Horowitz უხელმძღვანელებენ.
კომპანიის წინასწარი შეფასება (valuation), ახალი კაპიტალის ინექციამდე, 50 მილიარდ დოლარს შეადგენს. წყაროების ცნობით, დაფინანსებაში შესაძლოა ჩაერთოს ახალი ინვესტორი Battery Ventures, ასევე სტრატეგიული პარტნიორი Nvidia. თუ გარიგება წარმატებით დასრულდება, Cursor-ის ღირებულება თითქმის გაორმაგდება წინა რაუნდთან შედარებით, რომელიც სულ რაღაც ექვსი თვის წინ შედგა და კომპანია 29.3 მილიარდ დოლარად შეაფასა.
მიუხედავად იმისა, რომ ბაზარზე კონკურენცია მძაფრდება ისეთი პროდუქტების მხრიდან, როგორიცაა Anthropic-ის Claude Code და OpenAI-ის განახლებული Codex, Cursor-ის შემოსავლები სწრაფად იზრდება. ინფორმირებული პირების თქმით, კომპანია პროგნოზირებს, რომ 2026 წლის ბოლოსთვის მისი წლიური შემოსავალი (annualized revenue run rate) 6 მილიარდ დოლარს გადააჭარბებს. ეს ტრაექტორია მიუთითებს, რომ სტარტაპი მომდევნო 10 თვის განმავლობაში შემოსავლების მინიმუმ გასამმაგებას ელოდება. Bloomberg-ის მონაცემებით, თებერვალში Cursor-მა უკვე მიაღწია 2 მილიარდ დოლარიან წლიურ შემოსავალს.
ბევრი სხვა AI სტარტაპის მსგავსად, რომლებიც მესამე მხარის მოდელებზე არიან დამოკიდებულნი, Cursor-ს ბოლო დრომდე უარყოფითი მთლიანი მარჟა (gross margin) ჰქონდა. ეს ნიშნავს, რომ პროდუქტის მუშაობის ხარჯები აჭარბებდა იმ თანხას, რომელსაც მომხმარებლები იხდიდნენ. თუმცა, გასული წლის ნოემბერში საკუთარი მოდელის, Composer-ის დანერგვამ და შედარებით იაფი ჩინური მოდელის, Kimi-ს გამოყენებამ, კომპანიას მცირე მოგებაზე გასვლის საშუალება მისცა.
უფრო დეტალურ დონეზე, კომპანიამ დადებით მთლიან მარჟას მსხვილ კორპორაციულ კლიენტებთან მიაღწია, თუმცა ინდივიდუალური დეველოპერების ანგარიშებზე კვლავ ზარალს ნახულობს. გარე პროვაიდერებზე დამოკიდებულების შემცირებით, Cursor ცდილობს თავიდან აიცილოს საკუთარი მომწოდებლების მიერ მისი ჩანაცვლება. ამ მხრივ ყველაზე დიდ საფრთხეს Anthropic წარმოადგენს, რომლის Claude Code-იც სტარტაპის მთავარ მეტოქედ იქცა.
Cursor-მა და Battery Ventures-მა კომენტარის გაკეთებაზე უარი თქვეს. Thrive-ს, a16z-სა და Nvidia-ს წარმომადგენლებს კი კომენტარის მოთხოვნაზე ჯერ არ უპასუხიათ. Cursor, რომელიც ადრე Anysphere-ის სახელით იყო ცნობილი, 2022 წელს MIT-ის სტუდენტებმა — მაიკლ ტრუელმა, სუალეჰ ასიფმა, არვიდ ლუნემარკმა და ამან სანგერმა დააფუძნეს.