აშშ-ის უმსხვილესი ელექტროქსელი მონაცემთა ცენტრებისთვის დენის მიწოდების შეზღუდვას გეგმავს

აშშ-ის უმსხვილესი ელექტროქსელი მონაცემთა ცენტრების სიმრავლის გამო სერიოზული გამოწვევების წინაშე დადგა. მას შემდეგ, რაც გენერაციის სიმძლავრეების დამატების მიზნით გამართულმა აუქციონმა სასურველი შედეგი ვერ გამოიღო, ქსელის ოპერატორმა, PJM Interconnection-მა, განაცხადა, რომ ენერგიის დეფიციტის დროს მონაცემთა ცენტრებსა და სხვა მსხვილ მომხმარებლებს ელექტროენერგიის მიწოდებას შეუწყვეტს.

ეს გადაწყვეტილება მონაცემთა ცენტრების მშენებლობის სწრაფი ტემპითაა განპირობებული, რაც ქსელის ოპერატორებს ენერგიის გამომუშავების წყაროების ძიებაში აიძულებს. პროგნოზების თანახმად, 2035 წლისთვის მონაცემთა ცენტრები ოთხჯერ მეტ ელექტროენერგიას მოიხმარენ, ვიდრე დღეს. PJM მიწოდების შეზღუდვას 2027 წლის ივნისიდან დაიწყებს და ეს მხოლოდ იმ ობიექტებს შეეხება, რომელთა სიმძლავრე 50 მეგავატი ან მეტია.

ქსელის ოპერატორი ახალი გენერაციის სიმძლავრეებისთვის მორიგ აუქციონს ატარებს. სხვა მსგავსი პროგრამების ანალოგიურად, რომლებიც ათწლეულებია არსებობს და ჩვეულებრივ მსხვილ მწარმოებლებს მოიცავს, ის მომხმარებლები, რომლებსაც დენი გაეთიშებათ, კომპენსაციას მიიღებენ. ასეთი პროგრამები მომხმარებლებს წინასწარ ატყობინებენ მოსალოდნელი შეზღუდვის შესახებ — 30 წუთიდან რამდენიმე დღემდე ვადაში, პროგნოზირებული მოთხოვნიდან გამომდინარე.

ალტერნატიული ენერგიის წყაროები და გარემოსდაცვითი რისკები

ეს ნაბიჯი, სავარაუდოდ, აიძულებს ბევრ ახალ და არსებულ მონაცემთა ცენტრს, შექმნან ენერგიის საკუთარი წყაროები ადგილზე. ისინი, ვინც ამას ვერ შეძლებენ, სავარაუდოდ, სარეზერვო გენერატორებზე იქნებიან დამოკიდებულნი, რომელთა ექსპლუატაცია უფრო ძვირია და ხშირად გარემოსაც მეტად აბინძურებს. ბევრი მონაცემთა ცენტრი უპირატესობას დიზელის გენერატორებს ანიჭებს, რადგან საწვავი ხელმისაწვდომია და მისი შენახვა ადგილზეა შესაძლებელი.

ფედერალური რეგულაციები ასეთი გენერატორების გამოყენების უფლებას შემდეგი პირობებით იძლევა:

• წელიწადში 50 საათამდე — მოთხოვნის მართვის (demand response) ღონისძიებებისთვის;
• წელიწადში 100 საათამდე — საგანგებო სიტუაციებისა და ტექნიკური მომსახურების დროს.

ამ კვირაში Vantage Data Centers კრიტიკის ქარცეცხლში მოექცა ვირჯინიის გარემოსდაცვით რეგულატორებთან სავარაუდო კოორდინაციის გამო. საქმე ეხება ანგარიშს, რომლის მიხედვითაც, ჩრდილოეთ ვირჯინიაში მდებარე 96-მეგავატიანი მონაცემთა ცენტრის დიზელის სარეზერვო გენერატორებმა შესაძლოა მილიონობით დოლარის ზიანი მიაყენონ ადგილობრივი მოსახლეობის ჯანმრთელობას.

გამოწვევები მართვის პროცესში და მზარდი ფასები

PJM ბოლო თვეებში არაერთხელ გააკრიტიკეს ახალი გენერაციის სიმძლავრეებისა და მსხვილი მომხმარებლების, მათ შორის მონაცემთა ცენტრების მართვის მეთოდების გამო. ოპერატორის ტერიტორია ვირჯინიიდან ილინოისამდე ვრცელდება და ჯამში 67 მილიონ მომხმარებელს ემსახურება.

გასული წლის განმავლობაში ელექტროენერგიის საბითუმო ფასები თითქმის გაორმაგდა. PJM-ის დამოუკიდებელმა ბაზრის მონიტორმა ამ ზრდის დიდ ნაწილში პასუხისმგებლობა სწორედ მონაცემთა ცენტრებს დააკისრა.