Aurora-მ უპილოტო სატვირთოების მარშრუტი გააფართოვა და ახალი თაობის ტექნოლოგია წარადგინა

ავტონომიური მანქანების ტექნოლოგიურმა კომპანია Aurora-მ თავისი უპილოტო სატვირთოებისთვის მეორე კომერციული მარშრუტი გახსნა, რომელიც ფორტ-უერთსა და ელ-პასოს აკავშირებს და 600 მილის სიგრძისაა. გაფართოების შესახებ კომპანიამ მესამე კვარტლის ფინანსურ ანგარიშთან ერთად სამშაბათს განაცხადა.

ამასთანავე, Aurora-მ აღნიშნა, რომ ხუთი თვითმართვადი სატვირთოს გამოყენებით საჯარო გზებზე უკვე 100,000-ზე მეტი უპილოტო მილი დაფარა. ეს მნიშვნელოვანი მიღწევაა კომპანიისთვის, რომელმაც კომერციული სერვისი მიმდინარე წლის მაისში დაიწყო. კომპანიის შემდეგი გაცხადებული მიზანი წლის ბოლომდე ფინიქსის მიმართულებით გაფართოებაა.

Aurora-ს პირველი კომერციული მარშრუტი დალასსა და ჰიუსტონს შორის ამოქმედდა, რომლის საწყისი მომხმარებლები Hirschbach Motor Lines და Uber Freight იყვნენ. კომპანიის განცხადებით, ფორტ-უერთისა და ელ-პასოს მარშრუტი საკმარისად გრძელია, რომ გადამზიდავებისთვის მიმზიდველი გახდეს, რადგან ისეთ გამოწვევებს პასუხობს, როგორიცაა კადრების დეფიციტი და 10-საათიანი რეისის ერთ დღეში შესრულების სირთულე. ელ-პასოს მარშრუტის მომხმარებლები არიან Hirschbach Motor Lines და Russell Transport.

კომპანიამ ასევე გაასაჯაროვა დეტალები მომავალი თაობის აპარატურის შესახებ, რომელსაც Fabrinet-ი აწარმოებს და რომელიც Volvo VNL Autonomous სატვირთოებში ინტეგრირდება. Aurora გეგმავს, რომ 2026 წელს ამ ახალი ტექნოლოგიით ასობით სატვირთო ააწყოს. კომპანიის თქმით, ახალი აპარატურა უფრო გამძლეა, უკეთესი წარმადობა აქვს და მისი საერთო ღირებულება განახევრებულია.

Aurora-ს ახალი თაობის ლიდარს ობიექტების 1000 მეტრის მანძილზე აღქმა შეუძლია, რაც ამჟამინდელი თაობის შესაძლებლობებს ორჯერ აღემატება. კომპანიამ ასევე გააუმჯობესა სენსორების გაწმენდის სისტემა, რომელიც, მათი თქმით, რთულ ამინდის პირობებში უფრო საიმედოდ იმუშავებს.

„Aurora-ს ახალი თაობის აპარატურის ინტეგრაცია Volvo VNL Autonomous-თან ჩვენს New River Valley-ის საწარმოში ინდუსტრიაში პირველი ასეთი პარტნიორობაა და ხაზს უსვამს ჩვენს ერთობლივ მნიშვნელოვან პროგრესს“, — განაცხადა ნილს იეგერმა, Volvo Autonomous Solutions-ის პრეზიდენტმა. „ავტონომიურობისთვის შექმნილი სატვირთოების წარმოებით ჩვენ პროტოტიპების ფაზას ვცდებით და ვქმნით მასშტაბირებად გადაწყვეტილებებს, რომლებიც მზად არის თანამედროვე მიწოდების ჯაჭვის მოთხოვნებს უპასუხოს“.

ეს ახალი თაობის აპარატურა წინ უსწრებს უფრო დიდი მოცულობის წარმოებაზე გათვლილ ტექნოლოგიას, რომელიც Aumovio-სთან (ყოფილი Continental) ერთად მუშავდება და რომლის წარმოებაც 2027 წლისთვის იგეგმება. კომპანია გეგმავს, რომ Aumovio-სთან საწარმოო პარტნიორობის დაწყების შემდეგ, 2027 წლიდან „ათიათასობით თვითმართვადი სატვირთო“ გამოუშვას.