AWS-ის შემოსავლები მკვეთრად იზრდება: ღრუბლოვან სერვისებზე მოთხოვნა კვლავ პიკზეა

Amazon Web Services-მა (AWS) 2025 წელი ბოლო სამი წლის განმავლობაში ყველაზე მაღალი კვარტალური ზრდის მაჩვენებლით დაასრულა. ხუთშაბათს გამოქვეყნებული ფინანსური ანგარიშის თანახმად, კომპანიის ღრუბლოვანი სერვისების ბიზნესმა 2025 წლის მეოთხე კვარტალში 35,6 მილიარდი დოლარის შემოსავალი დააფიქსირა.

ეს მაჩვენებელი წინა წლის ანალოგიურ პერიოდთან შედარებით 24%-იან ზრდას ნიშნავს, რაც ამ ბიზნეს სეგმენტისთვის ბოლო 13 კვარტლის განმავლობაში ყველაზე მაღალი ზრდის ტემპია. Amazon-ის მონაცემებით, ღრუბლოვანი სერვისების წლიური შემოსავლის ტემპი (run rate) ამჟამად 142 მილიარდ დოლარს შეადგენს. გარდა ამისა, გაიზარდა საოპერაციო მოგებაც: მეოთხე კვარტალში მან 12,5 მილიარდი დოლარი შეადგინა, მაშინ როცა 2024 წლის იმავე პერიოდში ეს მაჩვენებელი 10,6 მილიარდი დოლარი იყო.

„142 მილიარდი დოლარის წლიურ ბრუნვაზე 24%-იანი ზრდის მიღწევა სრულიად განსხვავებული მასშტაბია, ვიდრე უფრო მცირე ბაზის მქონე კონკურენტების მიერ დაფიქსირებული მაღალი პროცენტული ზრდა“, - განაცხადა Amazon-ის გენერალურმა დირექტორმა, ენდი ჯასიმ, მეოთხე კვარტლის შედეგების განხილვისას. „ჩვენ კვლავ ვაგრძელებთ შემოსავლებისა და სიმძლავრეების უფრო მეტ მატებას, ვიდრე სხვები და ვიმყარებთ ლიდერის პოზიციას“.

ზრდის მამოძრავებელი ფაქტორები და პარტნიორობები

მეოთხე კვარტლის წარმატება მნიშვნელოვნად განაპირობა ახალმა შეთანხმებებმა ისეთ მსხვილ კომპანიებთან და სახელმწიფო სტრუქტურებთან, როგორიცაა Salesforce, BlackRock, Perplexity და აშშ-ის სამხედრო-საჰაერო ძალები. ჯასის განმარტებით, აშშ-ის 500 წამყვანი სტარტაპიდან უფრო მეტი იყენებს AWS-ს, როგორც ძირითად ღრუბლოვან პროვაიდერს, ვიდრე მის მომდევნო ორ უმსხვილეს კონკურენტს ერთად აღებულს.

ინფრასტრუქტურული თვალსაზრისით, AWS-მა მეოთხე კვარტალში თავის მონაცემთა ცენტრების ქსელს ერთ გიგავატზე მეტი სიმძლავრე დაამატა. კომპანიის ხელმძღვანელობა აღნიშნავს, რომ ბიზნესის მნიშვნელოვანი ნაწილი კვლავ მოდის იმ საწარმოებიდან, რომლებსაც სურთ საკუთარი ინფრასტრუქტურის ლოკალური სერვერებიდან (on-premise) ღრუბლოვან გარემოში გადატანა.

ხელოვნური ინტელექტის გავლენა

AWS-ის წარმატებაში გადამწყვეტ როლს თამაშობს ხელოვნური ინტელექტის (AI) ბუმიც. ენდი ჯასიმ ხაზი გაუსვა AWS-ის AI ტექნოლოგიების სრულყოფილ ფუნქციონირებას და აღნიშნა, რომ მომხმარებლებს სურთ თავიანთი AI სამუშაო პროცესები იქ განათავსონ, სადაც მათი დანარჩენი აპლიკაციები და მონაცემებია შენახული. მისივე თქმით, როდესაც მომხმარებლები AWS-ზე დიდ AI პროექტებს უშვებენ, ისინი პარალელურად ზრდიან თავიანთ ძირითად ღრუბლოვან რესურსებსაც.

ბაზრის რეაქცია და ფინანსური კონტექსტი

AWS-ის წილმა Amazon-ის მთლიან 213,4 მილიარდ დოლარიან შემოსავალში 16,6% შეადგინა. მიუხედავად ღრუბლოვანი სეგმენტის შთამბეჭდავი შედეგებისა, ეს არ აღმოჩნდა საკმარისი ინვესტორების დასამშვიდებლად. Amazon-ის აქციების ფასი ვაჭრობის დასრულების შემდეგ 10%-ით შემცირდა.

ინვესტორების ასეთი რეაქცია გამოიწვია კომპანიის გეგმამ კაპიტალური ხარჯების გაზრდის შესახებ, ასევე იმ ფაქტმა, რომ ერთ აქციაზე მიღებულმა მოგებამ Wall Street-ის მოლოდინები ვერ დააკმაყოფილა.