ბრიტანული სტარტაპი Emm „ჭკვიანი“ მენსტრუალური თასით ქალთა ჯანმრთელობის სფეროში რევოლუციას გეგმავს

ჯენი ბატონს კომპანია Emm-ის შექმნის იდეა COVID-ის ლოკდაუნის დროს გაუჩნდა. ის აქტიურად იყენებდა Oura-ს ბეჭედსა და Whoop-ის სამაჯურს სხეულის მონაცემების მისაღებად, თუმცა შენიშნა, რომ არ არსებობდა მოწყობილობა, რომელიც რეპროდუქციული და მენსტრუალური ჯანმრთელობის შესახებ ინფორმაციას მიაწვდიდა. „ეს სიგიჟედ მეჩვენებოდა, რადგან ყველა ქალს სურს, უკეთ ესმოდეს და აკონტროლებდეს ამ პროცესებს“, – განაცხადა მან TechCrunch-თან ინტერვიუში.

იდეის განსახორციელებლად ის Dyson-ის ერთ-ერთ ინჟინერს დაუკავშირდა და კონცეფციის ტესტირება დაიწყო. „ხუთი წლის, ათასობით დიზაინისა და მრავალი ცდის შემდეგ, ჩვენ შევქმენით მსოფლიოში პირველი „ჭკვიანი“ მენსტრუალური თასი“, – ამბობს ბატონი. ბრიტანულმა კომპანიამ პროდუქტის ბაზარზე გასატანად 9 მილიონი დოლარის (6.8 მილიონი ფუნტი) საწყისი დაფინანსება მოიზიდა, რაუნდს სათავეში Lunar Ventures ჩაუდგა.

პროდუქტი ჩვეულებრივი მენსტრუალური თასის მსგავსად ფუნქციონირებს, რომელიც სისხლს შეწოვის ნაცვლად აგროვებს. თუმცა, Emm-ის სამედიცინო დონის სილიკონი აღჭურვილია „ულტრა თხელი, მოწინავე სენსორული ტექნოლოგიით“. ეს სენსორი აგროვებს მონაცემებს, რომლებიც მომხმარებლებს საკუთარი ციკლის კანონზომიერებების გაანალიზებაში დაეხმარება. ბატონი იმედოვნებს, რომ ეს „მენსტრუალური და რეპროდუქციული ჯანმრთელობის კვლევის, დიაგნოსტიკისა და მკურნალობის ტრანსფორმაციას“ მოახდენს.

მისი აზრით, მენსტრუალური სისხლი ქალთა ჯანმრთელობის სფეროში „შეუმჩნეველი შესაძლებლობაა“, რომელსაც შეუძლია ისეთი ინფორმაციის მოწოდება, რასაც სისხლის მიმოქცევის სისტემაზე დაფუძნებული ანალიზები ვერ იძლევა. მაგალითად, ამ მონაცემებმა შესაძლოა ხელი შეუწყოს ენდომეტრიოზის მსგავსი მტკივნეული და ხშირად არასწორად დიაგნოსტირებული დაავადებების გამოვლენას.

„დღეს ყოველი მეათე ქალი ენდომეტრიოზით იტანჯება. ეს არის მდგომარეობა, რომლის დიაგნოსტირებას, სხვა რეპროდუქციული პრობლემების მსგავსად, საშუალოდ შვიდიდან ათ წლამდე სჭირდება“, – აღნიშნავს ბატონი. მისი აზრით, ეს შეფერხება „მნიშვნელოვანი მონაცემების ნაკლებობითა და კლინიკურ პირობებში მენსტრუალური ჯანმრთელობის არასათანადო აღწერითაა“ გამოწვეული. ის დასძენს, რომ ყოველი მესამე ქალი ცხოვრების განმავლობაში „რეპროდუქციული ჯანმრთელობის სერიოზულ პრობლემებს“ აწყდება.

მომხმარებლის მონაცემების უსაფრთხოება კომპანიისთვის პრიორიტეტულია. Emm-ის აპლიკაციიდან მიღებული ინფორმაცია დაშიფრულია, უსაფრთხოდ ინახება და დაცულია ორფაქტორიანი ავთენტიფიკაციით. „მონაცემები ყოველთვის ანონიმიზებული ან ფსევდონიმიზებულია“, რაც ნიშნავს, რომ პირადი იდენტიფიკატორები ამოღებულია ან კოდებითაა ჩანაცვლებული. მასზე წვდომა მხოლოდ Emm-ის იმ თანამშრომლებს ექნებათ, ვისთვისაც ეს აუცილებელია.

მოზიდული 9 მილიონი დოლარი გამოყენებული იქნება პროდუქტის მომავალ წელს ბრიტანეთის ბაზარზე გასაშვებად, სადაც წინასწარი შეკვეთების მომლოდინეთა სია უკვე 30,000-ს აჭარბებს. კაპიტალი ასევე მოხმარდება კვლევასა და განვითარებას. კომპანია აშშ-ის ბაზარზე შესვლას 2027 წლის დასაწყისში გეგმავს. დაფინანსების რაუნდში ასევე მონაწილეობდნენ Alumni Ventures (Oura-ს ინვესტორი), The Labcorp Venture Fund და BlueLion Global.

ჯენი ბატონის თქმით, მენსტრუალური ჯანმრთელობა Emm-ისთვის მხოლოდ საწყისი წერტილია. „საბოლოოდ, მჯერა, რომ ჩვენ უფრო ფართო გავლენას მოვახდენთ ქალთა ჯანმრთელობაზე“, – ამბობს ის. მისი მიზანია, მომავალში პროდუქტი გააფართოოს და მოიცვას დიაგნოსტიკა, სხვა ციფრული მოვლის ინსტრუმენტები და თერაპიული საშუალებებიც კი. „ჩვენი მისიაა, დავაჩქაროთ დიაგნოსტირება, მივცეთ ადამიანებს მონაცემები საკუთარი თავის დასაცავად და დავეხმაროთ მათ, აიღონ კონტროლი საკუთარ სხეულსა და ჯანმრთელობაზე“, – აცხადებს დამფუძნებელი.