ჩინეთში ჩიპების კონტრაბანდის შესახებ ცნობების ფონზე, Nvidia თვალთვალის პროგრამას ტესტავს

გავრცელებული ინფორმაციით, კომპანია Nvidia ტესტავს პროგრამულ უზრუნველყოფას, რომელიც ხელოვნური ინტელექტის ჩიპების ადგილმდებარეობის დადგენის საშუალებას იძლევა. ეს ნაბიჯი ჩინეთში კომპანიის პროდუქციის კონტრაბანდული გზით შეტანის შესახებ გახშირებულ ცნობებს უკავშირდება.

Reuters-ის მიერ ანონიმურ წყაროებზე დაყრდნობით გავრცელებული ინფორმაციის თანახმად, Nvidia-მ შექმნა ადგილმდებარეობის ვერიფიკაციის ტექნოლოგია, რომელიც კომპანიას საშუალებას მისცემს, დაადგინოს, რომელ ქვეყანაში იმყოფება კონკრეტული ჩიპი. პროგრამა აკონტროლებს გამოთვლით წარმადობას, ხოლო სერვერებს შორის კომუნიკაციის შეყოვნება ჩიპის გეოგრაფიული მდებარეობის შესახებ იძლევა წარმოდგენას.

აღნიშნული პროგრამული უზრუნველყოფის გამოყენება მომხმარებლებისთვის ნებაყოფლობითი იქნება და, Reuters-ის ცნობით, ის პირველ ეტაპზე Blackwell-ის სერიის ჩიპებისთვის იქნება ხელმისაწვდომი. ეს სიახლე ბოლო დღეებში გავრცელებულ ცნობებს მოჰყვა, რომლის მიხედვითაც, ჩინური ხელოვნური ინტელექტის მოდელები, DeepSeek, სავარაუდოდ, კონტრაბანდული გზით შეტანილ Nvidia Blackwell-ის ჩიპებზეა გაწვრთნილი.

Nvidia-მ ამ ცნობებს უპასუხა და განაცხადა, რომ ამ ტიპის კონტრაბანდის დამადასტურებელი მტკიცებულებები არ უნახავს. „ჩვენ არ გვინახავს რაიმე მტკიცებულება ან მიგვიღია ინფორმაცია „მოჩვენებითი მონაცემთა ცენტრების“ შესახებ, რომლებიც ჩვენი და ჩვენი OEM პარტნიორების მოსატყუებლად აშენდა, შემდეგ კი დაიშალა, კონტრაბანდულად გადაიტანეს და სხვაგან ხელახლა ააწყვეს. მიუხედავად იმისა, რომ ასეთი კონტრაბანდა ნაკლებად სავარაუდოდ გვეჩვენება, ჩვენ ვიძიებთ ნებისმიერ ინფორმაციას, რომელსაც ვიღებთ“, - განუცხადა Nvidia-ს წარმომადგენელმა TechCrunch-ს.

ეს სიახლე გავრცელდა რამდენიმე დღის შემდეგ, რაც Nvidia-მ აშშ-ის მთავრობისგან მიიღო თანხმობა, ჩინეთში დამტკიცებული მომხმარებლებისთვის H200 სერიის ხელოვნური ინტელექტის ჩიპების გაყიდვა დაეწყო. მნიშვნელოვანია, რომ ეს ნებართვა ეხება მხოლოდ ძველ, H200 ჩიპებს და არა კომპანიის უახლეს, Blackwell-ის სერიის პროდუქციას.