DeepSeek-ის საბაზრო ღირებულება პირველივე საინვესტიციო რაუნდით შესაძლოა 45 მილიარდ დოლარამდე გაიზარდოს

ჩინური ხელოვნური ინტელექტის ლაბორატორია DeepSeek-ი ვენჩურული კაპიტალის მოზიდვის პირველ რაუნდთან დაკავშირებით მოლაპარაკებებს აწარმოებს. სულ რამდენიმე კვირაში კომპანიის პოტენციური საბაზრო ღირებულება 20 მილიარდიდან 45 მილიარდ დოლარამდე გაიზარდა, რის შესახებაც ინფორმაციას Financial Times-ი და Bloomberg-ი ავრცელებენ.
DeepSeek-მა საზოგადოების ყურადღება 2025 წლის დასაწყისში მიიპყრო, როდესაც წარადგინა დიდი ენობრივი მოდელი, რომლის გაწვრთნაც ამერიკულ გიგანტებთან, მაგალითად OpenAI-სა და Anthropic-თან შედარებით, ბევრად ნაკლები გამოთვლითი სიმძლავრითა და ხარჯებით მოხერხდა. მას შემდეგ კომპანია წარმატებით უწევს კონკურენციას მსოფლიოს წამყვან მოდელებს ისეთ სფეროებში, როგორიცაა ლოგიკური მსჯელობა და პროგრამირება. ამასთან, DeepSeek-ი ინარჩუნებს ღია კოდის პრინციპს და მისი ვერსიები თავისუფლად არის ხელმისაწვდომი Hugging Face-ის პლატფორმაზე.
ლაბორატორია ჩინელმა მილიარდერმა, ჰეჯ-ფონდების მმართველმა ლიანგ ვენფენგმა დააფუძნა, რომელიც კომპანიის თითქმის 90%-ს აკონტროლებს. FT-ის ცნობით, აქამდე ლაბორატორიას ინვესტორების მოძიება არ უცდია. თუმცა, იმის გამო, რომ კონკურენტები DeepSeek-ის მკვლევარების გადაბირებას ცდილობენ, ლიანგმა დაფინანსების მოზიდვა გადაწყვიტა, რათა თანამშრომლებს კომპანიის წილები შესთავაზოს.
Bloomberg-ის ინფორმაციით, საინვესტიციო რაუნდს, სავარაუდოდ, სახელმწიფო საინვესტიციო ფონდი, China Integrated Circuit Industry Investment Fund-ი უხელმძღვანელებს. ჩინეთი აქტიურად ცდილობს ადგილობრივი ხელოვნური ინტელექტის ტექნოლოგიების დაფინანსებას, რათა თავიდან აიცილოს ამერიკულ ტექნოლოგიებზე, განსაკუთრებით კი ჩიპებზე დამოკიდებულება.
DeepSeek-ის მოდელები ოპტიმიზებულია ჩინური ტექნოლოგიური გიგანტის, Huawei Technologies-ის მიერ წარმოებულ ჩიპებზე სამუშაოდ. ეს კომბინაცია ქვეყნისთვის მძლავრ ინსტრუმენტად მიიჩნევა საკუთარი ხელოვნური ინტელექტის განსავითარებლად, რომელიც აშშ-ს გაუწევს კონკურენციას. მოლაპარაკებებში მონაწილეობის მისაღებად ასევე ემზადებიან ჩინური ქლაუდ-გიგანტები Tencent-ი და Alibaba. თავად DeepSeek-ის წარმომადგენლებს ამ საკითხზე კომენტარი ჯერ არ გაუკეთებიათ.