„ეს სერიალი ადამიანების შექმნილია“ — ვინს გილიგანის ახალი შოუ ხელოვნური ინტელექტის წინააღმდეგ

Apple TV+-ის ახალი სერიალის, „პლურიბუსის“ ფინალურ ტიტრებში მაყურებელი უჩვეულო წარწერას შენიშნავს: „ეს სერიალი ადამიანების მიერაა შექმნილი“. ეს მოკლე, მაგრამ შინაარსიანი გზავნილი შესაძლოა, სხვა რეჟისორებისთვისაც მაგალითი გახდეს, ვისაც სურს, ხაზი გაუსვას, რომ მათი ნამუშევარი გენერაციული ხელოვნური ინტელექტის გამოყენების გარეშე შეიქმნა.

სერიალის შემქმნელი, ვინს გილიგანი, რომელიც ცნობილია ისეთი საკულტო პროექტებით, როგორიცაა „Breaking Bad“ და „Better Call Saul“, ამ საკითხზე კიდევ უფრო კატეგორიულია. გამოცემა Variety-სთან ინტერვიუში მან პირდაპირ განაცხადა: „მეზიზღება ხელოვნური ინტელექტი“.

მან ტექნოლოგიას „მსოფლიოში ყველაზე ძვირადღირებული და ენერგოინტენსიური პლაგიატის მანქანა“ უწოდა. გილიგანმა ხელოვნური ინტელექტის მიერ შექმნილი კონტენტი შეადარა „მცოხნავ ძროხას — უაზრობის დაუსრულებლად გადამუშავებულ ციკლს“.

„მადლობა, სილიკონის ველო!“, — დასძინა მან სიცილით, — „კიდევ ერთხელ მოახერხეთ და სამყარო გააფუჭეთ“. აღსანიშნავია, რომ ტიტრებში ეს ლაკონური გზავნილი განთავსებულია იმ წარწერის პირდაპირ ქვემოთ, რომელიც ცხოველების უსაფრთხოებაზე მზრუნველი სპეციალისტების გადასაღებ მოედანზე ყოფნას ადასტურებს.

„პლურიბუსი“ „საიდუმლო მასალების“ ყოფილი სცენარისტის სამეცნიერო ფანტასტიკის ჟანრში დაბრუნებაა. სერიალში მასთან ერთად მუშაობს „Better Call Saul“-ის ვარსკვლავი, რეა სიჰორნი. ის განასახიერებს რომანტიკული ფენტეზის ჟანრის მწერალს, რომელიც უცხოპლანეტელების შემოჭრას უპირისპირდება.