Ford-ის მომმარაგებელ ალუმინის ქარხანაში მორიგი ხანძარი გაჩნდა, რაც F-150-ის წარმოებას კვლავ საფრთხის ქვეშ აყენებს

ნიუ-იორკის შტატის ქალაქ ოსვეგოში მდებარე Novelis-ის ალუმინის ქარხანაში, რომელიც Ford-ის სატვირთო მანქანებისთვის, მათ შორის სრულად ელექტრო F-150 Lightning-ისთვის, ლითონის ფურცლებს აწარმოებს, მორიგი ხანძარი გაჩნდა. ეს ბოლო რამდენიმე თვის განმავლობაში საწარმოში მომხდარი უკვე მესამე ინციდენტია.

ხუთშაბათს დილით დაწყებულმა ხანძარმა მეოთხე, უმაღლესი სირთულის კატეგორია მიიღო და ამ დრომდე არ ჩაუქრიათ. „ყველა თანამშრომლის ევაკუაცია უსაფრთხოდ განხორციელდა. ხანძარი კონტროლს ექვემდებარება, თუმცა მეხანძრეები ადგილზე რჩებიან მის სრულ ლიკვიდაციამდე“, — განუცხადეს TechCrunch-ს Novelis-ში. ინციდენტის შესახებ პირველად ადგილობრივმა გამოცემამ CNY Central-მა გაავრცელა ინფორმაცია.

Novelis-ის ქარხანას სერიოზული პრობლემები სექტემბერშიც შეექმნა, როდესაც მასშტაბურმა ხანძარმა საწარმოო პროცესი სრულად შეაჩერა. ოქტომბერში მომხდარი შედარებით მცირე ინციდენტის მიუხედავად, ალუმინის მომმარაგებელი დეკემბერში ნიუ-იორკის საწარმოში წარმოების განახლებას გეგმავდა.

სექტემბრის ხანძრის გამო Ford-მა მნიშვნელოვანი ზარალი განიცადა. კომპანიის განცხადებით, წარმოების შეფერხება ავტომწარმოებელს, სავარაუდოდ, დაახლოებით 2 მილიარდი დოლარი დაუჯდებოდა. Ford-ი იძულებული გახდა, F-150-ის თითქმის ყველა მოდელის წარმოება შეემცირებინა, რადგან ეს პიკაპები უკვე წლებია ალუმინის კორპუსით გამოდის.

ავტომწარმოებელმა სატვირთოების აწყობა ნელ-ნელა ოქტომბერში განაახლა, თუმცა პრიორიტეტი ბენზინისა და ჰიბრიდულ ვერსიებს მიანიჭა, ელექტრო F-150 Lightning-ის ხარჯზე. გავრცელებული ინფორმაციით, კომპანიის ხელმძღვანელობა ელექტრო პიკაპის წარმოებიდან ამოღების საკითხსაც კი განიხილავს.

სექტემბრის ხანძარმა, მართალია, მცირე მასშტაბით, მაგრამ მაინც იმოქმედა სხვა ავტომწარმოებლებზეც, მათ შორის Stellantis-სა და Nissan-ზე, რომლებმაც ასევე შეამცირეს წარმოების მოცულობა.

ამ ეტაპზე უცნობია, თუ რა გავლენას მოახდენს ახალი ხანძარი Ford-ის სამომავლო გეგმებზე. კომპანიას კომენტარის მოთხოვნაზე დაუყოვნებლივი პასუხი არ გაუცია. ასევე, კომენტარს არ აკეთებს ოსვეგოს სახანძრო დეპარტამენტი.