Google Assistant-ს Android Auto-ში Gemini ცვლის: რა ახალი შესაძლებლობები ეძლევათ მძღოლებს

Google-მა ოფიციალურად გამოაცხადა, რომ Android Auto სისტემაში Google Assistant-ს ახალი თაობის ხელოვნური ინტელექტი, Gemini, ჩაანაცვლებს. ეს ცვლილება მილიონობით ავტომობილში ინტეგრირებულ სმარტფონის პროექციის ტექნოლოგიას შეეხება და მისი გლობალური გავრცელება უკვე დაიწყო.

განახლება ხელმისაწვდომი იქნება იმ მომხმარებლებისთვის, რომლებსაც სმარტფონებზე Google Assistant-ის ნაცვლად უკვე Gemini აქვთ გააქტიურებული. Android Auto არის აპლიკაცია, რომელიც მომხმარებლის ტელეფონზე მუშაობს და უსადენოდ გადასცემს ისეთ ფუნქციებს, როგორიცაა ნავიგაცია, მუსიკა და შეტყობინებები, ავტომობილის ეკრანზე.

Gemini-ს ინტეგრაციით, Google მძღოლებს საშუალებას აძლევს, მართვის დროს უფრო ბუნებრივად ისაუბრონ და შეასრულონ კომპლექსური ამოცანები. ეს ცვლილება კომპანიის გრძელვადიანი სტრატეგიის ნაწილია, რომელიც Google Assistant-ის სრულად ჩანაცვლებას ითვალისწინებს Gemini-თ ყველა მოწყობილობასა და პლატფორმაზე.

ახალი ფუნქციონალით მომხმარებლებს შეუძლიათ დასვან შეკითხვები მარშრუტზე არსებული ბიზნესების შესახებ. მაგალითად, მძღოლს შეუძლია იკითხოს: „ჰეი, Google, მწვადი მომინდა. შეგიძლია მაჩვენო გზად რომელიმე კარგი ადგილი, რომელიც ახლა ღიაა და ჩემს დანიშნულების პუნქტთან ახლოსაა?“

თუ რომელიმე ადგილი საინტერესოდ მოეჩვენება, Gemini-ს შეუძლია დამატებითი ინფორმაციის მოწოდება, მაგალითად, რესტორნის ყველაზე პოპულარული კერძის შესახებ ან იმის თაობაზე, არის თუ არა დაწესებულებაში ძაღლების შეყვანა ნებადართული. ასევე, შესაძლებელია შეტყობინებების შეჯამება და პასუხის გაცემა.

მომხმარებელს შეუძლია სთხოვოს Gemini-ს, მისწეროს მეგობარს, რომ საცობში მოჰყვა და შეტყობინებას მგზავრობის სავარაუდო დროც დაურთოს. გარდა ამისა, შესაძლებელია შეტყობინების გაგზავნამდე სხვა ენაზე თარგმნაც. Gemini-ს ასევე აქვს წვდომა Gmail-ზე, რაც მართვისას ელექტრონული ფოსტის გამოყენების საშუალებას იძლევა.

მაგალითად, მომხმარებელს შეუძლია თქვას: „ამაღამ სასტუმრო მაქვს დაჯავშნილი. მგონი, მისამართი მეილზე მაქვს. შეგიძლია შეამოწმო და ნავიგაცია ჩართო?“ Gemini-ს ასევე შეუძლია წაუკითხავი წერილების მოკლე შინაარსის მოყოლა.

ხელოვნური ინტელექტი მუსიკის შერჩევაშიც დაგეხმარებათ. შეგიძლიათ სთხოვოთ, შექმნას დასაკრავი სია კონკრეტული ინსტრუქციებით: „შეგიძლია შემირჩიო მუსიკა გზისთვის? სასურველია, იყოს ხალისიანი, დაახლოებით 3 საათის ხანგრძლივობის და ისეთი, რომ მეც მომეწონოს და ბავშვებსაც“. ეს ფუნქცია მუშაობს ისეთ სერვისებთან, როგორიცაა YouTube Music, Spotify და სხვა.

Google-ის განცხადებით, მომხმარებლებს შეეძლებათ უბრალოდ ესაუბრონ Gemini-ს ნებისმიერ თემაზე ფრაზით: „ჰეი, Google, მოდი ვისაუბროთ“. ამის შემდეგ შეგიძლიათ განიხილოთ იდეები ან ისწავლოთ რაიმე ახალი. მაგალითად: „სენტ-ლუისში მივდივარ ქორწილში. შეგიძლია ჩემი გიდი იყო და საინტერესო ფაქტები მომიყვე ამ ქალაქის შესახებ?“

საუბრის გაგრძელება სხვა თემაზეც შეიძლება: „მადლობა სენტ-ლუისის შესახებ ინფორმაციისთვის. ახლა სხვა რამეზე გადავიდეთ, სადღესასწაულო ვახშამი მისი მშობლების სახლშია და მინდა, პატარა საჩუქარი მივუტანო. რას მირჩევდი?“

Gemini-ს გავრცელება Android Auto-ში გლობალურად, 45 ენაზე, ხუთშაბათიდან დაიწყო. მის გამოსაყენებლად საჭიროა, რომ ტელეფონზე Gemini-ს აპლიკაცია გეყენოთ. როდესაც ფუნქცია თქვენთვის ხელმისაწვდომი გახდება, მანქანის ეკრანზე შესაბამისი შეტყობინება გამოჩნდება. გასააქტიურებლად უნდა თქვათ „Hey, Google“, დააჭიროთ მიკროფონის ღილაკს ეკრანზე ან ხანგრძლივად დააჭიროთ ხმოვანი მართვის ღილაკს საჭეზე.