Google Gemini-ს ეფექტურობის გასაზრდელად ახალ AI ჩიპზე მუშაობს

Alphabet, Google-ის მშობელი კომპანია, ახალ სერვერულ ჩიპს აპროექტებს, რომელიც Gemini-ს ხელოვნური ინტელექტის მოდელების მუშაობის ეფექტურობას მნიშვნელოვნად გაზრდის. გამოცემა The Information-ის მიერ ანონიმურ წყაროებზე დაყრდნობით გავრცელებული ინფორმაციით, ახალი ჩიპი შიდა მოხმარებისთვის „Frozen v2“-ის სახელითაა ცნობილი და მისი გამოშვება 2028 წლისთვის იგეგმება.ანგარიშის თანახმად, ახალი ჩიპი შესაძლოა 6-დან 10-ჯერ უფრო ეფექტური იყოს Google-ის ამჟამინდელ AI ჩიპებთან შედარებით. ეფექტურობის საზომად გამოყენებულია ენერგიის ერთეულზე გენერირებული ტოკენების რაოდენობა. TechCrunch-თან საუბრისას კომპანიას აღნიშნული ინფორმაცია პირდაპირ არ დაუდასტურებია, თუმცა არც უარყოფა გაუკეთებია.„ჩვენი გუნდები მუდმივად იკვლევენ და ცდიან ახალ ინოვაციებს, რათა მომხმარებლებს მაქსიმალური წარმადობა და ეფექტურობა შევთავაზოთ“, — განაცხადეს Google-ში. „მიუხედავად იმისა, რომ ყველა პროექტი არ გადადის წარმოების ეტაპზე, ეს მკაცრი კვლევა ჩვენი სრული ციკლის (full stack) მიდგომის ცენტრალური ნაწილია. აპარატურული და პროგრამული უზრუნველყოფის ერთობლივი პროექტირებით, ჩვენ უზრუნველვყოფთ სისტემების ინტეგრირებას და ოპტიმიზაციას რეალური სამუშაო დატვირთვისთვის“.ხელოვნური ინტელექტის სფეროში მოღვაწე კომპანიები სულ უფრო ხშირად ცდილობენ საკუთარი ჩიპების წარმოებას. ეს მათ ეხმარება შიდა მოდელების ეფექტურობის გაზრდაში და AI გამოთვლითი სიმძლავრეების გლობალური დეფიციტის პრობლემის მოგვარებაში. მსგავსი ეფექტურობა ტექნოლოგიური გიგანტებისთვის გადამწყვეტი არგუმენტი გახდა, რადგან AI-ზე გაწეული ხარჯების გამო ბაზარზე არსებული ეიფორია გარკვეულწილად შენელდა.ამავდროულად, კომპანიები ცდილობენ შეამცირონ დამოკიდებულება ჩიპების მწარმოებელ Nvidia-ზე, რომელიც ისტორიულად დომინირებს AI ჩიპების ბაზარზე. ივნისში OpenAI-მ თავისი პირველი სპეციალიზებული ჩიპი, ინფერენციის პროცესორი სახელად Jalapeño წარადგინა. მიმდინარე თვის დასაწყისში კი გავრცელდა ინფორმაცია, რომ Anthropic-ი Samsung-თან ახალ პარტნიორობას განიხილავს ჩიპების წარმოების მიმართულებით.ინვესტორები ადრე გამოთქვამდნენ შეშფოთებას Alphabet-ის მასშტაბური ხარჯების გამო, რომლებიც AI სტრატეგიის განვითარებას ხმარდება. მიმდინარე წლის დასაწყისში Google-მა განაცხადა, რომ 180-დან 190 მილიარდ დოლარამდე დახარჯვას გეგმავს. ასეთი დიდი ფსონების ფონზე, კომპანიამ უნდა დაამტკიცოს, რომ ეს ინვესტიციები მომგებიანი იქნება.ინფორმაციამ უფრო ეფექტური Frozen v2 ჩიპის შესახებ ინვესტორები დაამშვიდა, რამაც Google-ის პოზიციები გააძლიერა კვარტალური ანგარიშის გამოქვეყნებამდე. The Information-ის პუბლიკაციის შემდეგ, ორშაბათს დილით კომპანიის აქციების ფასი დაახლოებით 3%-ით გაიზარდა.